ՀՅԴ Լիբանանի Կեդրոնական Կոմիտէն Այցելեց Վարչապետ Հարիրիի

ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի, ընկերակցութեամբ զբօսաշրջութեան նախարար Աւետիս Կիտանեանի, երէկ այցելեց վարչապետ Սաատ Հարիրիի:

Վարչապետին Կեդրոնական Պէյրութի բնակարանին մէջ տեղի ունեցած հանդիպումին ընթացքին քննարկուեցան երկրին քաղաքական բեմը յուզող իրադարձութիւնները:

Հանդիպումէն ետք երեսփոխան Բագրատունի հաստատեց, որ վարչապետ Հարիրիի մօտ կը տիրէ դրական մթնոլորտ: «Ան մնայուն աշխատանքի մէջ է եւ կ՛ողջունէ բոլորին ջանքերը, ինչպէս նաեւ իր կարգին ճիգ չի խնայեր` հանրապետութեան նախագահ զօր. Միշել Աունի հետ առկայ հարցերը, յատկապէս Լեռնալիբանանի միջադէպը լուծելու նպատակով», ըսաւ ան:

Յ. Բագրատունի նշեց, որ իրենք հանդիպումէն դուրս եկած են այն տպաւորութեամբ, որ կան որոշ դրական նշոյլներ, որոնք սակայն յաւելեալ ջանքերու եւ քաղաքական ուժերուն միջեւ յաւելեալ համաձայնութեան կը կարօտին` արդիւնաւորուելու համար:

Անդրադառնալով 2019-ի պետական ամավարկին` Յ. Բագրատունի շեշտեց, որ վարչապետ Հարիրի յանձնառու է անոր կէտերը գործադրելու` խորհրդարանէն անոր ստանալիք վաւերացումէն ետք:

«Դժբախտաբար, Հայկական երեսփոխանական պլոքը նկատած էր եւ  նախքան Լեռնալիբանանի միջադէպը կոչ ուղղած քաղաքական բոլոր ուժերուն` վերջ տալու սուր կեցուածքներուն եւ հռետորաբանութեան, որովհետեւ քաջ գիտեր, թէ Լիբանան ի վիճակի չէ նման բան հանդուրժելու: Մանաւանդ որ ամառ է եւ կը գտնուինք զբօսաշրջութեան եղանակի մէջ ու կը վստահինք այդ մարզին», ըսաւ երեսփոխան Բագրատունի:

Ան հաստատեց, որ լիբանանցի քաղաքացիները այսօր կը դիմագրաւեն հարցեր, որոնց մէկ մասին իրենք ծանօթ են, իսկ միւս մասին ծանօթ չեն: «Լիբանանցիները իրաւունք ունին բոլոր պատասխանատուներէն պահանջելու, որ տէրը ըլլան իրենց խիղճին` քաղաքացիներուն եւ Լիբանանին օժանդակելու իմաստով, որպէսզի կարելի ըլլայ այս տագնապէն դուրս գալ», ընդգծեց Յ. Բագրատունի: