Կենսաթոշակների 10 տոկոս բարձրացման համար անհրաժեշտ կլինի 25 մլրդ դրամ. Ատոմ Ջանջուղազյան

Այսօր ՀՀ վարչապետ Նիկոլ Փաշինյանը կառավարության նիստի ընթացքում հայտարարեց, որ 2020-2022 թվականների պետական միջնաժամկետ ծախսերի ծրագրի շրջանակում 2020 թվականի հունվարի 1-ից ՀՀ-ում 10 տոկոսով կբարձրանան կենսաթոշակները: Լրագրողների հետ ճեպազրույցում ֆինանսների նախարար Ատոմ Ջանջուղազյանն ասաց, որ կենսաթոշակների բարձրացման համար լրացուցիչ տրամադրվելիք գումարի գնահատված չափը շուրջ 25 մլրդ ՀՀ դրամ է:

«Բյուջեն այլ աղբյուր, քան պետական բյուջեի եկամուտներն են և ներգրավվող պարտքն է, չունի»,- նշեց նա:

Իսկ թե լրացուցիչ որքա՞ն գումար է պետք նվազագույն աշխատավարձը 55 հազար դրամից 68 հազար դրամ դարձնելու համար, խոսակցություններ կան, որ շուրջ 69 մլրդ դրամ, Ատոմ Ջանջուղազյանը պատասխանեց, որ դա կախված է ընդունվող օրենքի բովանդակությունից՝ ինչպիսին կլինի փոփոխությունը, այսինքն՝ խոսքը վերաբերում է այնպիսի կարգավորումներին, որոնք կազդեն միայն նվազագույն աշխատավարձ ստացողների վրա։