Առաջին շահագրգռված մարդիկ մենք ենք, որ սպանությունները բացահայտվեն. Լևոն Քոչարյան

Վերաքննիչ քրեական դատարանի դիմաց, ուր այսօր քննվում էր սահմանադրական կարգի տապալման մեջ մեղադրվող ՀՀ երկրորդ նախագահ Ռոբերտ Քոչարյանին կալանքից ազատելու, «Մարտի 1»-ի գործը կասեցնելու և Սահմանադրական դատարան ուղարկելու դեմ Դատախազության ու տուժող կողմի փաստաբանների բողոքները, զուգահեռաբար անցկացվում էին բողոքի ակցիաներ` ի պաշտպանություն և ընդդեմ Ռոբերտ Քոչարյանի: Երկու ճամբարների միջև բախման միջադեպեր գրանցվեցին: Ընդդեմ Քոչարյանի բողոքի ակցիա իրականացնողերի կողմից շիշ նետվեց Ռոբերտ Քոչարյանի աջակիցների ուղղությամբ, որից հետո իրավիճակը դատարանի բակում սրվեց։ Ցուցարարների միջեւ բախումը կանխեցին ոստիկանները, և ցուցարարներից երկուսին բերման ենթարկեցին ոստիկանության բաժին՝ շիշ նետելու և ոստիկանների օրինական պահանջը չկատարելու մեղադրանքով:

Դատական նիստից հետո լրագրողների հետ զրույցում Ռոբերտ Քոչարյանի որդին` Լևոն Քոչարյանն անդրադարձավ մարտի 1-ի գործով իր հորն ուղղված մեղադրանքներին: Նրա համոզմամբ` մեղադրող մարդիկ մոլորված են, կամ էլ նրանց մոլորեցրել են:

«Առաջին շահագրգռված մարդիկ մենք ենք, որ սպանությունները բացահայտվեն: Շատ ցավալի է, որ ինչ-որ շրջանակներ այդ ամենը փորձում են մեզ հետ կապել: Ամենից լավ բանն այն կլինի, որ գործը բացահայտվի»,- ասաց նա: Պատասխանելով այն հարցին, թե որտեղից իրենց ընտանիքին նման հարստություն, Լևոն Քոչարյանը պատասխանեց. «Բերեք փաստեր, և կոչ եմ անում գործեր հարուցեն, եթե կան կասկածներ: Եկեք այսպես պայմանավորվենք, միլիարդավոր դոլարները գտեք, բոլորովս կիսվում ենք»: