ՀՀ ԱԳ նախարարը Բուշ-դյու-Ռոնի Դեպարտամենտային խորհրդի նախագահին ներկայացրել է Արցախի հիմնախնդիրը

Մայիսի 29-ին ԱԳ նախարար Զոհրաբ Մնացականյանն ընդունել է Բուշ-դյու-Ռոնի Դեպարտամենտային խորհրդի նախագահ Մարտին Վասալի գլխավորած պատվիրակությանը, որի կազմում էին նաև Բուշ-դյու-Ռոնի Դեպարտամենտային խորհրդի առաջին փոխնախագահ Պատրիկ Բորը և Մարսելի փոխքաղաքապետ Դիդիե Փարաքյանը:

ԱԳՆ-ից  հայտնում են, որ կողմերը բարձր են գնահատել տարբեր ոլորտի ներկայացուցիչներից կազմված քառասուն հոգանոց պատվիրակության այցելությունը Հայաստան եւ  այցի շրջանակներում անցկացվող տարբեր հանդիպումները, ինչը լավ հնարավորություն է տեղում քննարկելու հայ-ֆրանսիական երկկողմ օրակարգի տարբեր ոլորտներին առնչվող համագործակցության հեռանկարները:

Հայաստանի ԱԳՆ ղեկավարը նշել է, որ ներկայացուցչական պատվիրակության այս այցն արտացոլում է հայ-ֆրանսիական հարաբերությունների բազմաբովանդակ էությունը, որը մշտապես աչքի է ընկել առավել խորը փոխգործակցությամբ եւ երկու երկրների ժողովուրդների միջեւ ավանդական սերտ կապերով:

Անդրադառնալով հայ-ֆրանսիական օրակարգի մի շարք հարցերի՝ զրուցակիցները որպես համագործակցության կարեւոր ուղղություն առանձնահատուկ ընդգծել են բիզնես շրջանակների միջեւ կապերի խրախուսումը, տեղեկատվական տեխնոլոգիաների, ստարտափերի, նորարարական եւ ստեղծագործ կրթության ոլորտում համատեղ նախագծերի նախաձեռնումը:

Երկուստեք կարևորվել է հայ համայնքի կարեւոր դերակատարությունը Ֆրանսիայի հասարակական-քաղաքական կյանքում, որը նաեւ ամուր կապող օղակ է երկու բարեկամ երկրների միջեւ։

Զրուցակիցներն առանձնահատուկ կարեւորել են  ապակենտրոնացված համագործակցության ընդլայնումն ու զարգացումը՝ որպես երկկողմ օրակարգի առավել հարստացմանն ուղղված քայլ:

Հայաստանի արտաքին քաղաքական գերատեսչության ղեկավարը գործընկերներին ներկայացրել է Հայաստանում տեղի ունեցած վերջին ներքաղաքական զարգացումները եւ կառավարության կողմից իրականացվող բարեփոխումների ընթացքը՝ այդ համատեքստում կարեւորելով միջազգային գործընկերների հետ շարունակական համագործակցությունը:  

Զրուցակցի խնդրանքով՝ նախարար Մնացականյանը հակիրճ անդրադարձել է Լեռնային Ղարաբաղի հիմնախնդրի խաղաղ կարգավորման գործընթացում վերջին զարգացումներին՝ ընդգծելով Հայաստանի մոտեցումները եւ սկզբունքային դիրքորոշումը: