Մերկելն աջակցել է Կիպրոսին Թուրքիայի ապօրինի գործողությունների հարցում

Գերմանիայի կանցլեր Անգելա Մերկելն իր աջակցությունն է հայտնել Կիպրոսին Միջերկրական ծովի արևելյան շրջանում Թուրքիայի կողմից հորատման աշխատանքներ սկսելու կապակցությամբ.  հաղորդում է Deutsche welle-ի թուրքական ծառայությունը:

Ռումինիայում երեկ անցկացված` ԵՄ առաջնորդների ոչ պաշտոնական գագաթնաժողովից հետո տեղի ունեցած մամլո ասուլիսում, պատասխանելով լրագրողի` «Կիպրոսը պահանջում է պատժամիջոցներ Թուրքիայի նկատմամբ, Գերմանիան կաջակցի՞ նման քայլի» հարցին, կանցլերը նշել է. «Կիպրոսի նախագահ Նիկոս Անաստասիադիսն ինձ հայտնել է իր անհանգստությունների մասին և հավելել, որ երբեք հավանության չեն արժանանցի այդ գործողությունները: Մեզնից խնդրեց, որ, եթե Թուրքիայի հետ շփում ունենք, պաշտպանենք Կիպրոսի շահերը: Մենք էլ անելու ենք դա»:

Բացի այդ` Մերկելը նշել է, որ չի քննարկվել Թուրքիայի նկատմամբ  պատժամիջոցներ կիրառելու թեման:

Թուրքիային քննադատել էր նաև ԵԽ նախագահ Դոնալդ Տուսկը` պահանջելով հարգել այլ երկրների ինքնիշխանությունը: