18 տարեկաններին առաջնագիծ չտանելու մասին նախագիծն ԱԺ հանձնաժողովում չընդունվեց

ԱԺ պաշտպանության, անվտանգության հարցերի մշտական հանձնաժողովում այսօր քննարկվում էր «Բարգավաճ Հայաստան» խմբակցության առաջարկը «Զինվորական ծառայության և զինծառայողի կարգավիճակի մասին օրենքում» փոփոխություններ կատարելու վերաբերյալ:

Նախատեսվող փոփոխությունները վերաբերում էին 18 տարեկաններին պաշտպանական սահմանի առաջին գիծ չուղարկելուն:

«Նախաձեռնությամբ նախատեսում ենք փոփոխություններ կատարել մարտական հերթապահության կարգի մեջ: Առաջարկում ենք, որ մարտական հերթապահություն իրականացնեն ոչ թե 18 տարեկան, այլ մեկ տարի փորձառություն ունեցող զինծառայողները։ 18 տարեկանը չափազանց փոքր տարիք է մարտական հերթապահություն իրականացնելու համար։ Այս սկզբունքը պահպանելու արդյունքում մենք չենք ունենա զոհեր, դժբախտ պատահարներ»,- ասաց խմբակցության պատգամավոր, ԱԺ փոխխոսնակ Վահե Էնֆիաջյանը:

Նրա փաստարկները, սակայն, համոզիչ չէին ոչ խորհրդարանի մեծամասնության` «Իմ քայլի», ո'չ էլ ընդդիմադիր մյուս թևի` «Լուսավոր Հայաստանի» համար: Հանձնաժողովը փոփոխությունների փաթեթին բացասական եզրակացություն տվեց:

Հիշեցնենք, որ կառավարությունը նույնպես նախագիծը չէր հաստատել։