Եթե գյուղատնտեսության մեջ ամբողջ պրոցեսը միտված չլինի արտահանմանը, մենք գյուղատնտեսությունում զարգացում չենք կարող ունենալ. Փաշինյան

«Իմ քայլը» խմբակցության պատգամավոր Էդգար Առաքելյանն ԱԺ-ում վարչապետին հարց ուղղեց` ընդգծելով, որ մի կողմից գյուղատնտեսությունը երկրում համարվում է գերակա ուղղություն, մյուս կողմից` ծրագրված է այն ձուլել տնտեսական զարգացման և ներդրումների նախարարությանն ու արդյունքում ունենալ մեկ ընդհանուր՝ էկոնոմիկայի նախարարություն: Պատգամավորին հետաքրքրեց, թե որքանո՞վ է կառավարությունը հաստատակամ գյուղատնտեսության առանձին նախարարություն չունենալու որոշման մեջ:

 «Մենք ասում ենք, որ մեր տնտեսությունը պետք է լինի արտահանող, և ասում ենք՝ եթե մեր գյուղատնտեսության մեջ ամբողջ պրոցեսը միտված չլինի արտահանմանը, մենք գյուղատնտեսությունում զարգացում չենք կարող ունենալ: Եթե չգանք նոր տեխնոլոգիաների, չենք կարող զարգացում ունենալ: Տնտեսական զարգացման և ներդրումների նախարարությունն է զբաղվում, այդ թվում՝ գյուղատնտեսական ապրանքների արտահանման կազմակերպման և մեխանիզմների ստեղծման հարցով: Մենք կարծում ենք, որ այս տրամաբանության մեջ շատ համահունչ է, որ լինի մեկ ընդհանուր նախարարություն»,- պատասխանեց Փաշինյանը: