Էլ ֆեյքերից ինչո՞ւ են նեղանում, որ քրֆում են. Էդմոն Մարուքյան

«Լուսավոր Հայաստան» կուսակցությունը չի պատրաստվում կողմ քվեարկել կառավարության բերած բոլոր նախագծերին միայն այն բանի համար, որ իրենց անունը իշխանական լրատվամիջոցները չկապեն Ռոբերտ Քոչարյանի կամ Սերժ Սարգսյանի հետ: Այդ մասին ասաց ԼՀԿ խմբակցության ղեկավար Էդմոն Մարուքյանը ԱԺ ճեպազրույցների ժամանակ:

«Լրատվամիջոցներից մեկն անանուն խմբագրական էր հրապարակել՝ գրելով, թե ընդդիմությունը պատռել է իր դիմակը, իսկ մեկ այլ լրատվամիջոց էլ ծայրահեղության մեջ էր ընկել ու գրել, որ ԼՀԿ-ն հանդիպում է նախագահ Սարգսյանի հետ՝ խնդրելով հովանավորել իրենց: Եթե լրատվամիջոցն այդպիսի բան է գրում, ապա ինչո՞ւ են նեղանում  «Ֆեյսբուք»-ի օգտատերերից, որ քրֆում են: Այսինքն` ինչ նախագիծ բերեն, պետք է վախից կո՞ղմ քվեարկենք, որ չասեն Ռոբերտ Քոչարանն ու Սրեժ Սարգսյանն են մեր հետևում: Է՞ս ա նոր Հայաստանը: Տեղ ենք հասել, իջեք»,- ասաց նա:

Անդրադառնալով ՀԱԿ-ի այն առաջարկությանը, թե կարիք կա կիսանախագահական կառավարման մոդելի անցնելու, Մարուքյանը նախ ասաց, որ իրենք հարգում են ՀԱԿ-ի առաջարկը՝ հետ գնալ կիսանախագահական կառավարման համակարգի, բայց համակարծիք չեն Տեր-Պետրոսյանի ղեկավարած ուժի դիրքորոշման հետ:

«Պառլամենտական կառավարման համակարգի անցնելը դեռևս ամբողջությամբ ապահովված չէ, և պետք է գնալ այդ ուղղությամբ, այլ ոչ թե հետքայլ կատարել: Խորհրդարանական կառավարումը չհամտեսած` նորից հետ գանք կիսանախագահի, կարծում եմ՝ հետընթաց է: Մենք պետք է առաջ գնանք: Այն խեղաթյուրված համակարգը, որ դրել են՝ սուպերվարչապետականը, դրանից պետք է ազատվել ու առաջ գնալ դեպի խորհրդարանական երկիր»,- ասաց Էդմոն Մարուքյանը: