Աղջկեքն են նեղանում. Տիգրան Արզաքանցյան

ՀՀԿ-ական գործարար, նախկին պատգամավոր Տիգրան Արզաքանցյանը շարունակում է թիկնապահներով շրջել: Այս մասին ՀՀԿ համագումարում Yerkir.am-ի հետ զրույցում հայտնեց հենց ինքը` Արզաքանցյանը:

Հարցին, թե Ձեր կյանքին շարունակո՞ւմ է վտանգ սպառնալ, Արզաքանցյանն արձագանքեց. «Հիմա ոչ մեկ ապահովագրված չի, չէ՞»:

Պարզվում է ՀՀԿ-ական գործարարի ներկայիս թիկնապահները այլեւս ոստիկանության աշխատակիցներ չեն` հայտնի միջադեպից հետո, երբ ոստիկանները հրապարակավ զինաթափել էին Արզաքանցյանի թիկնապահներին, որոնք ինչպես հետո պարզվեցին` ոստիկանության աշխատակիցներ էին:

Մեր այն դիտարկմանը, թե նեղացել եք այդ միջադեպից եւ այդ իսկ պատճառով եք փոխել թիկնապահներին, ՀՀԿ-ական գործարար արձագանքեց. «Չէ, նեղանալը որ մեկն ա, կյանք ա, աղջկեքն են նեղանում, տղամարդիկ չեն նեղանում, տղամարդիկ որոշում են կայացնում»:

Մեր խնդրանով անդրադառնալով Վլադիմիր Գասպարյանի այն հայտարարությանը, որ Արզաքանցյանի համար այնպիսի «կոնցերտ» կկազմակերպի, ՀՀԿ-ական գործարարն ընդգծեց. «Ինքն ինձ չարձագանքեց, իրան արձագանքեց, ես դրա վրա ուշադրություն չեմ դարձնում: Չգիտեմ, թե խի տենց արեցին, բայց երեւի իրանց տենց ա պետք աշխատել, ինձ դա չի հետաքրքրում, ես իմ գործերով եմ զբաղվում»: