Էրդողանի հետ իմ հարաբերությունները հիմնված են հարգանքի, անկեղծության և ազնվության վրա. Հունաստանի վարչապետ

Հունաստանի վարչապետ Ալեքսիս Ցիպրասը մինչ Թուրքիա այցելելը խոսել է թուրք-հունական հարաբերությունների մասին: Ըստ թուրքական ayıdınlık.com.tr կայքի` Ցիպրասը մասնավորապես նշել է. «Պետք է կառուցել այնպիսի հարաբերություն, որը և' ժողովրդական, և' տարածաշրջանային առումով օգտակար կլինի»: Բացի այդ` նա խոսել է փախստականների, Էգեյան ճգնաժամի, Տրանսադրիատիկ գազատարի կառուցման մասին և նշել է, որ, մասնավորապես, Էգեյան ճգնաժամի պատճառով երկուստեք մահացությունների թիվը նկատելիորեն աճել է:

Խոսելով իր և Էրդողանի հարաբերությունների մասին` Ցիպրասը նշել է. «Իմ հարաբերությունները  հիմնված են հարգանքի, անկեղծության  և ազնվության վրա: Դեռևս 2017 թվականի դեկտեմբերին  սկսված դժվարին երկխոսությունը նոր հնարավորություն պետք է դառնա և ավելի բարելավի մեր երկկողմ օրակարգը»:

Հունաստանի վարչապետն անդրադարձել է նաև Հունաստանի մուսուլման փոքրամասնությունների իրավունքներին, այդ առիթով մեջբերել Լոզանի կոնֆերանսի որոշումները և նշել, որ փոքրամասնությունների իրավունքներին աջակցելու խնդիրը պետք է կրի երկկողմանի բնույթ: