ԱԶԳ. Ազնվության համար` Հայաստանին հետմրցութային 12 միավոր

Թեպետ Հայաստանը չանցավ ESC եզրափակիչ, բայց գերմանացի Շրաթցլզեեր ամուսինների համար նրանք մեծ հաղթող են մնում. մայիսի 19-ից սկսյալ (նաեւ 20-ին, 21-ին) գրում են ընթերցողների մեծ բանակ ունեցող գերմանական «Էքսպրեսը», «Ռայնիշե փոստը»: Առաջինին հղում անելով` լուրը տարածում է նաեւ T-online ինտերնետային լրատուն:

Բանն այն է, որ ճանաչված փաստաբան դոկտ. Ֆոլքեր Շրաթցլզեերը տիկնոջ` Ռոզվիթայի հետ «Եվրատեսիլի» եզրափակիչին հաջորդած կիրակի օրը կնունքի արարողության է հրավիրված լինում Դյուսելդորֆի հինգաստղանի «Շթայգենբերգեր փարք» հյուրանոցում, ուր, ի թիվս այլ պատվիրակությունների, իջեւանել էր նաեւ Հայաստանի պատվիրակությունը:

Տիկինը, որ կնունքի առիթով առանձնահատուկ շքեղ հանդերձանքով էր ներկայացել, զուգարանում լվացվելու ժամանակ լվացարանակոնքին է մոռանում իր 20 000 եվրոյի ադամանդաքար սպիտակ ոսկուց պատրաստված եւ մորից ու մորաքրոջից ժառանգություն ստացած մատանին: Տունդարձին հայտնաբերում է, որ թանկարժեք իրը թողել է հյուրանոցում, շտապում է այնտեղ, դահլիճից սկսած` փնտրում են ամենուրեք, չեն գտնում, եւ ինչ ուրախություն, ընդունարանում նրան վերադարձնում են մատանին` հաղորդելով, թե նույն օրը գտածոն ստացել են Հայաստանի պատվիրակության երկու անդամներից:

«Դյուսելդորֆյան ժյուրին նրանց ազնվության համար հետմրցութային 12 միավոր է շնորհում»,- գրում է «Էքսպրեսսը»: Իսկ «Ռայնիշե փոստը»` մեջբերելով Շրաթցլզեեր ամուսինների խոսքերը, ափսոսանք է հայտնում, թե «չգիտեն Հայաստանի պատվիրակության` այդ երկու կանանց անունները, որոնց ազնվության դիմաց կուզենային կարգին պարգեւավճարով շնորհակալ լինել»:

Կիրակի օրը Հայաստանի պատվիրակությունը հյուրանոցը լքել է, իսկ ընդունարանում դժվարացել են հաղորդել ազնիվ հայուհիների անունները, քանի որ սենյակները պատվիրված են եղել պատվիրակությունների անուններով:

Եվրոտեսիլյան հաղթանակից հետո Ադրբեջանի նավթով ու գազով ողողված գերմանական մամուլի ամենօրյա համայնապատկերում հայկական ազնվության մասին լուրը փոքրիկ` մանանեխի հատիկի չափ հավատ է ծնում, միգուցե շուտով դիվանագիտական միջազգային կառույցներն էլ ԼՂ անկախության ճանաչումը արժանի պարգեւավճար սահմանեն` հանուն պատմական արդարության, ինքնորոշման ազնիվ պայքարի դիմաց: Ի՞նչ վատ ռեալպոլիտիկ է: