Փայլանը մեջլիսում թուրքական պետությանը մեղադրել է Դինքի սպանության մեջ. տեսանյութ

Վաղը լրանում է Պոլսում լույս տեսնող հայկական «Ակօս» թերթի խմբագիր Հրանտ Դինքի սպանության 12-րդ տարելիցը: Սպանության գործն այսքան տարի բացահայտված չէ:

Թուրքիայի քրդամետ Ժողովուրդների դեմոկրատական կուսակցության հայ պատգամավոր Կարո Փայլանը մեջլիսում հարցուպատասխանի ժամանակ բարձրաձայնել է Հրանտ Դինքի սպանության գործով դատական գործընթացի ոչ պատշաճ կերպով ընթանալու մասին:

«Հրանտ Դինքը սպանվեց 2007 թ.-ի հունվարի 19-ին։ Մարդասպանին Տրապիզոնի Փելիթլի բնակավայրից ուղեկցեցին անվտանգության աշխատակիցները, և Ստամբուլում նրան դարձյալ դիմավորեցին անվտանգության աշխատակիցները։ Տեսագրություններում երևում է, թե Դինքը սպանվել է տասնյակ անվտանգության աշխատակիցների ներկայությամբ։ Չնայած բոլոր այս տեսագրություններն առկա են և ներկայացվել են դատարան, 12 տարի է` պետությունն այս մարդկանց չի կանգնեցրել արդարադատության առաջ։ Ում էլ որ կանգնեցրել է, չի դատապարտել ու ազատ է արձակել»,- ասել է Փայլանը` շեշտելով, որ պետությունը Դինքի սպանության համար միշտ մեղադրել է «Էրգենեքոն» խմբավորմանը կամ գյուլենականներին:

Նրա  խոսքով` իրականությունն այն է, որ սպանությունը հենց պետությունն է կազմակերպել և խրախուսել, և բոլոր անձինք, որոնք առնչություն են ունեցել Դինքի սպանությանը, պետական բարձր պաշտոններ են ստացել։ «Սպանությունը քողարկողները մասնակից են դառնում այդ սպանությանը»,- ասել է Փայլանը:

Նա մեջլիսում ելույթի տեսանյութը հրապարակել է իր ֆեյսբուքյան էջում: