Եթե ապացուցեն Մարտի 1-ի հետ կապ ունեմ, պատասխանատվության կենթարկվեմ, եթե` ոչ, թող շանտաժ անողը ենթարկվի. Ծառուկյան

«Բարգավաճ Հայաստան» կուսակցության նախագահ Գագիկ Ծառուկյանը պնդում է, որ Մարտի 1-ի գետ կապ չունի: 

«Ես ի՞նչ կապ ունեմ Մարտի 1-ի հետ: Ես կարող եմ ձեզ մի բան ասել` գնացեք, բացեք «Հայկական ժամանակ» թերթը` Նիկոլ Փաշինյանի թերթը, որտեղ գրված էր` միակ մարդը, որ ժողովրդի կողքին է  եղել, չի էլ մասնակցել Մարտի 1-ի դեպքերին»,- խորհրդարանում լրագրողներին ասաց նա:

Դիտարկմանը` փաստահավաք խմբի զեկույցում գրված է, որ իր թիկնազորը ստացել է ՊՆ համազգեստ, Ծառուկյանն արձագանքեց. «Թիկնազորից ո՞վ, մեկի անունը տվեք, մեկին ցույց տվեք: Ախր չի կարելի ցեխ շպրտել»:

Դիտարկմանն էլ` Էդմոն Մարուքյանն ասում էր` գնացեք, նայեք` ինչ է  ասվում փաստահավաք խմբի զեկույցում, պատասխանեց. «Մարդիկ սխալ են արել, դրա համար պետք է պատասխանատվության ենթարկվեն: Ես հիմա պահանջում եմ` ով Մարտի 1-ի համար այդպիսի ցուցմունք տվել է, ապացուցի, ապացուցելու դեպքում թող ինձ կալանավորեն, չապացուցի` իրեն կալանավորեն: Ես անուն չեմ ասում: Ով հայտարարել է Ծառուկյանի անունը, թիկնազորի անունը, եթե ինքը չի ապացուցում, ուրեմն ինքն անբարոյական մարդ ա: Եթե ապացուցի,  ուրեմն մեղավոր ենք, պատժվենք, իսկ եթե` չէ, էդ շանտաժ անողները թող պատժվեն, որ այդ ամեն ինչն ավարտվի»: