Հույս ունեի, որ այս ընտրություններում վերացած է լինելու տակից, կողքից, վերևից օգնելը. Էդմոն Մարուքյան

«Ելք» խմբակցության պատգամավոր, «Լուսավոր Հայաստան» կուսակցության ցուցակի առաջին համար Էդմոն Մարուքյանը դատախազի` ՀՀԿ-ական պատգամավոր Արամ Հարությունյանին անձեռնմխելիություն զրկելու մասին  միջնորդությունը չի համարում շոու: Այս մասին նա հայտարարեց խորհրդարանում լրագրողների հետ զրույցում:

Պատգամավորը նշեց, որ դրա մասին վաղուց խոսվել էր, և բոլորը գիտեին, որ այդ միջնորդությունը պետք է  լինի: «Այստեղ շոուի բան չկա, իսկ, ընդհանրապես, ամբողջ քարոզարշավը շոու է»,- ասաց նա և հավելեց, որ որևէ մեկը շոուից չպետք է բողոքի:

Էդմոն Մարուքյանը նաև համարում է, որ քարոզարշավը չի կարող հավասար պայմաններում անցկացվել: Ըստ նրա` եթե իշխանությունը մասնակցում է ընտրություններին, ուրեմն ավելի շատ հենց նա է լուսաբանվում, հետևաբար` «հավասար պայմաններ» ասելը սխալ է:

Մարուքյանը նշեց, որ իրեն ավելի շատ անհանգստացնում է այն հանգամանքը, որ մարդիկ վախեցած են և չեն գալիս իրենց հանրահավաքներին: Իսկ թե ումի՞ց են վախենում, նա չգիտի: «Եթե մարդիկ վախեցած են գալ` ԼՀ-ի քարոզարշավը լսելու, ես այդտեղ ֆունդամենտալ մտահոգություն ունեմ: Այստեղ երկու պատճառ կա` իներցիա, և երկրորդը` իրապես մարդկանց վախեցնում են: Իսկ ո՞վ է վախեցնում, դրանով պետք է զբաղվեն իշխանությունները»,- ասաց պատգամավորը:

Մարուքյանի խոսքով` քարոզարշավի ընթացքում ասել են` այսօր քիչ մարդ է եկել նրանց հավաքին, բայց «տակից» իրենց են օգնելու: «Ժողովո'ւրդ ջան, տակից մեզ պետք չէ օգնել, մեզ վրայից է պետք օգնել: Եթե ուզում եք ընտրել ԼՀ-ին, ընտրեք, վախենալո՞ւ է ԼՀ-ին ընտրելը, հա՞: Ի՞նչ խնդիր կա: Ես հույս ունեի, որ այս ընտրություններում վերացած է լինելու տակից, կողքից, վերևից օգնելը»,- ասաց նա: