Մենք այլ ուժերի սևացնելով չենք զբաղվելու. ՀՅԴ ԳՄ անդամ

Հայ Յեղափոխական Դաշնակցությունը խորհրդարանական արտահերթ ընտրությունների քարոզարշավի ընթացքը հնարավորինս արդյունավետ է փորձելու օգտագործել: Հիմնական նպատակը իր ծրագիրը ներկայացնելն է, որը բխում է երկրում առկա խնդիրներից. լրագրողների հետ հանդիպման ժամանակ ասաց ՀՅԴ Հայաստանի Գերագույն մարմնի անդամ Արթուր Եղիազարյանը:

Նրա խոսքով՝ այլ ուժերի սևացնելով չեն զբաղվելու և հույս ունեն, որ ներկայիս իշխանության՝ մյուս ուժերին սև ու սպիտակի բաժանելու ձեռագիրն այս անգամ չի կրկնվելու:

Թեև Դաշնակցությունը ճիշտ չի համարում, որ ընտրություններն այդքան շուտ՝ դեկտեմբերի 9-ին նշանակվեցին, բայց, որպես պատասխանատու քաղաքական ուժ, չէր կարող դուրս մնալ ընտրական գործընթացներից:

Դաշնակցության նախընտրական ցուցակում ընդգրկված Արթուր Եղիազարյանը նշում է՝ անելու են առավելագույնն այս ընտրություններում հաջողելու և խորհրդարան անցնելու համար: Նրա խոսքով` Դաշնակցության ներկայությունն Ազգային ժողովում ոչ թե իրենց է պետք, այլ ժողովրդին. իշխանությանը հակակշիռ է պետք, կառուցողական ընդդիմություն: