Եվրոպական երկրները ցանկանում են պահպանել Իրանի հետ Միջուկային համապարփակ համաձայնագիրը. Ղասեմի

Իրանը շարունակում է հավատարիմ մնալ Միջուկային համապարփակ համաձայնագրին այն պատճառով, որ դա պնդում են եվրոպական երկրները: Այս մասին, ըստ aliqonline.ir-ի, հայտարարել է Իրանի ԱԳՆ պաշտոնական ներկայացուցիչ Բահրամ Ղասեմին:

«Եվրոպան պնդում է, որ հավատում է Միջուկային համապարփակ համաձայնագրին և ցանկանում է պահպանել այն: Մենք դուրս չենք գալիս համաձայնագրից՝ ելնելով ԵՄ անդամ երկրների պնդումներից, այդ պատճառով նրանք պետք է կատարեն իրենց պարտավորությունները»,- ասել է ԱԳՆ մամուլի խոսնակը՝ հիշեցնելով, որ ԱՄՆ-ի պատժամիջոցները շրջանցելու պարագայում Իրան-ԵՄ համագործակցության մեխանիզմի ստեղծման հարցը վերջնական չի որոշվել:

Միևնույն ժամանակ, ԱԳ նախարարի`  քաղաքական հարցերով տեղակալ Աբբաս Արաղչին էլ տեղեկացրել է, որ Իրանը և ԵՄ-ն աշխատում են «Special Purpose Vehicle» (SPV) միջբանկային կապի ալիքի ստեղծման` ֆինանսական նոր մեխանիզմի վրա։ Այս համակարգը պետք է փոխարինի «SWIFT»-ին և թույլ տա շրջանցել Իրանի հանդեպ ԱՄՆ պատժամիջոցները։