Կառավարության նիստերը կլինեն դռնբաց

Այսօր կառավարության նիստում  արդարադատության նախարարի պաշտոնակատար Արտակ Զեյնալյանը ներկայացրեց կառավարության նիստերը դռնբաց անցկացնելու մասին որոշման նախագիծը։

Ըստ գործող օրենքի` առավարության նիստերը դռնփակ են, իսկ վարչապետի որոշմամբ նիստի մի մասը կարող է անցկացվել դռնբաց:

Զեյնալյանը հայտնեց, որ որոշման նախագծով` կառավարության նիստերը կլինեն դռնբաց, իսկ վարչապետի որոշմամբ նիստն ամբողջությամբ կամ դրա մի մասը կարող է անցկացվել դռնփակ: Նաև ընդլայնվելու են վարչապետի աշխատակազմի ղեկավարի լիազորությունները, ըստ որի՝ վարչապետի որոշման հավելվածը ստորագրում է վարչապետի աշխատակազմի ղեկավարը՝ դրանով հաստատելով, որ տվյալ հավելվածը վարչապետի ընդունածն է:

Վարչապետի պաշտոնակատար Նիկոլ Փաշինյանն ասաց, որ այսպիսով լուծում են նաև ժամանակին աղմուկ հանած հարցը: «Հիշում եք, որ օրենքով նախատեսված է, որ նիստերը դռնփակ են: Հիմա մենք հակառակն ենք անում՝ նիստերը կլինեն դռնբաց: Բնականաբար, դռնփակի անհրաժեշտություն կլինի, դրա համար որոշում կկայացնենք»,- ասաց նա:

Որոշումն ընդունվեց: