Պետք է արմատախիլ անել վարչական լծակների օգտագործումը. Փաշինյան

Այսօր, մինչ կառավարության նիստի օրակարգին անցնելը, վարչապետի պաշտոնակատար Նիկոլ Փաշինյանը նշեց, որ ավարտվել է խորհրդարանական արտահերթ ընտրություններին մասնակցելու հայտ ներկայացնելու ժամկետը, և լիարժեք թևակոխել ենք նախընտրական փուլ: Նա շեշտեց, որ ընտրությունների անցկացման քաղաքական պատասխանատվությունը կրում է  կառավարությունը:

«Մենք խնդիր ենք դրել` երրորդ հանրապետության պատմության ամենաորակյալ եւ լավագույն ընտրություններն անցկացնել: Կարծում եմ՝ այս նշաձողը պետք է բարձրացնել, պետք է անցկացնենք միջազգային ամենաբարձր չափանիշներին համապատասխանող ընտրություններ»,- ասաց Փաշինյանը:

Նա հայտարարեց, որ հարկավոր է բացառել հանրակրթության ոլորտի ներքաշումը ընտրական գործընթացների մեջ, անհրաժեշտ է արմատախիլ անել վարչական լծակների օգտագործումը: «Մեր ընտրություններում եղել է «ասողների» ինստիտուտը, երբ ասում են, թե ում օգտին պետք է քվեարկել: Դա պետք է բացառել: Ընտրողի որոշումը պետք է ձեւավորվի քարոզարշավի, քաղաքական բովանդակության արդյունքում»,- ասաց Փաշինյանը` հավելելով նաև, որ ընտրակաշառքի հարցում էլ իրավապահ մարմինները պետք է պրոֆիլակտիկ աշխատանքներ իրականացնեն, որ բանը չհասնի պատժելուն:

Վարչապետի պաշտոնակատար անդրադարձավ նաև ընտրացուցակներին` նշելով, որ պետք է բացառել մեկ ընտրական տարածքից մեկ այլ ընտրական տարածք «միգրացիան»: