Դավիթ Շահնազարյանը ՀՀԿ ցուցակով կմասնակցի ընտրություններին. Tert.am

1992-95թթ. ՀՀ նախագահի հատուկ հանձ­նարարություններով դեսպան, Ազգային անվտանգության ծառայության նախկին ղեկավար, Տարածաշրջանային հետազոտությունների հայկական կենտրոնի վերլուծաբան Դավիթ Շահնազարյանը  Tert.am-ի  հետ զրույցում հաստատել է տեղեկությունները, որ ընդունել է առաջարկը՝ ՀՀԿ ընտրացուցակով մասնակցել Ազգային ժողովի արտահերթ ընտրություններին:

«Իմ այս որոշման հիմքում խորը մտահոգություններն են` կապված Հայաստանի և Արցախի Հանրապետություններին սպառնացող հարաճուն վտանգների հետ:  Գործող հեղափոխական վարչախումբը ոչ միայն եղած մարտահրավերներին ու սպառնալիքներին համարժեք քաղաքականություն չի վարել, այլև վեցամսյա իր գործունեությամբ ու անգործությամբ բազմապատկել է եղածները, ավելացրել նորերը: Ամենայն պատասխանատվությամբ հայտարարում եմ` 1988-ից ի վեր երբեք սպառնալիքներն ու մարտահրավերներն այնքան վտանգավոր ընթացք չեն ունեցել, որքան ներկայում: Օրվա հրամայականը Հայաստանի ու Արցախի պետականությունների անվտանգությունը հեղափոխականության սպառնալիքներից պաշտպանելն է»,-ասել է նա: