«Լուսավոր Հայաստան» կուսակցությունը խորհրդարանական ընտրություններին կմասնակցի առանձին ցուցակով

«Լուսավոր Հայաստան» կուսակցությունը որոշում է կայացրել Ազգային ժողովի առաջիկա ընտրություններին մասնակցել «Լուսավոր Հայաստան» կուսակցության ցուցակով՝ սեփական տեսլականով և ծրագրերով։ Այս մասին ասված է կուսակցության տարածած հաղորդագրության մեջ:

«Լուսավոր Հայաստան Կուսակցությունը իր կազմավորման հիմքում դրել է երկրում համակարգային, անշրջելի վերափոխումների առաքելությունը։ Կուսակցության խորհրդարանական առաջին ընտրություններում «Ելք» կուսակցությունների դաշինքով մասնակցությունը պատմական և ճակատագրական դարձավ ոչ միայն մեր ժողովրդի նորագույն պատմության, այլև «Ելք» դաշինքի յուրաքանչյուր կուսակցության համար առանձին-առանձին։

Հայաստանում տեղի ունեցած հեղափոխությունը որակապես փոխել է երկրում քաղաքական առաջնայնությունները՝ առաջին անգամ քաղաքական գործընթացների մասնակից յուրաքանչյուր սուբյեկտին շնորհելով հավասար մասնակցային հնարավորություններ։ «Լուսավոր Հայաստան» Կուսակցությունը, «Հանրապետություն» Կուսակցության հետ երկար քննարկումների արդյունքում որոշում է կայացրել Ազգային Ժողովի առաջիկա ընտրություններին մասնակցել «Լուսավոր Հայաստան» Կուսակցության ցուցակով՝ սեփական տեսլականով և ծրագրերով։

«Լուսավոր Հայաստանն իր ցուցակում կներգրավի նաև ներկայացուցիչներ այլ գաղափարակից քաղաքական ուժերից և ակտիվ քաղաքացիական խմբերից։ Երևանի ավագանու ընտրություններից հետո բարձր գնահատելով «Հանրապետություն» կուսակցության հետ «Լույս» դաշինքով համատեղ անցած ճանապարհը՝ կուսակցությունները կշարունակեն համագործակցությունը Երևանի ավագանիում «Լույս» խմբակցության շրջանակներում:

Հարգանքով`

Լուսավոր Հայաստան կուսակցություն»,- ասված է հայտարարության մեջ։

Հիշեցնենք, որ 2017 թվականի խորհրդարանական ընտրություններից առաջ ձևավորվեց ԵԼՔ դաշինքը՝ ՔՊ, ԼՀ և Հանրապետություն կուսակցություններից: Իսկ սեպտեմբերի 23-ին ԼՀ և Հանրապետություն կուսակցությունները Երևանի արտահերթ ավագանու ընտրություններին մասնակցեցին «Լույս» դաշինքով: