Օկինավայում վերսկսել են ԱՄՆ-ի նոր ռազմաբազայի շինարարությունը

Ճապոնական Օկինավա պրեֆեկտուրայի Նագո քաղաքի Հենոկո շրջանում ափամերձ գոտին  ավազով ծածկելու աշխատանքները վերասկսվել են: Այդ մասին հայտնել է Ճապոնիայի կառավարության գլխավոր քարտուղար Եեսիհիդե Սուգան Տոկիոյում մամուլի ասուլիսի ժամանակ. տեղեկացնում է РИА Новости-ն:

Նպատակը ԱՄՆ-ի նոր ռազմաբազան այնտեղ տեղափոխելն է: Օկինավայի իշխանությունները օգոստոսին հետ էին կանչել այդ աշխատանքները թույլատրող լիցենզիան: Պրեֆեկտուրայի ղեկավար Դենի Տամակին ցանկանում է հանդիպել Ճապոնիայի վարչապետ Սինձո Աբեի հետ Ֆուտեմմա ամերիկյան ռազմաբազայի տեղը փոխելու հարցը քննարկելու համար: Կառավարությունը ցանկանում է տեղափոխել այն Հենոկո, իսկ Օկինավայի վարչակազմը ցանկանում է, որ այն պրեֆեկտուրայի սահմաններից դուրս լինի:

Նախատեսվում է, որ ծովի ափամերձ գոտին ավազով ծածկելուն ուղղված աշխատանքները կմեկնարկեն տարեվերջին:

Նշենք, որ Ֆուտեմմա բազան աշխարհում ամենավտանգավորն է համարվում, քանի որ մոտ է բնակելի տներին, և 2006-ին ԱՄՆ-ի և Ճապոնիայի հետ ձեռք բերված համաձայնության համաձայն` այն պետք է Գինովանից տեղափոխվի Հենոկո: Դրա համար անհրաժեշտ է ափամերձ գոտու 157 հա տարածք ավազով ծածկել, ինչը էկոլոգիական վնաս կհասցնի: Բնակիչները բողոքում են դրա դեմ: