Կբարելավվեն 4 ՔԿՀ-ների կոմունալ-կենցաղային պայմանները, ձեռք կբերվեն համակարգիչներ

Այսօր կառավարության նիստում արդարադատության նախարարությունը ներկայացրեց նախարարությանը վերաբաշխմամբ գումար հատկացնելու մասին հարցը, որով նախատեսվում է բարելավել 4 ՔԿՀ-ներում` «Դատապարտյալների հիվանդանոց», «Աբովյան», «Կոշ», «Հրազդան» քրեակատարողական հիմնարկներում, դատապարտյալների եւ կալանավորված անձանց բնակության կոմունալ-կենցաղային պայմանները: Մասնավորապես կբարելավվի ՔԿՀ-ների արտաքին եւ ներքին ջրամատակարարումը, ջրահեռացումը, ինչպես նաև նոր համակարգիչներ ձեռք կբերվեն:

Փոխվարչապետ Արարատ Միրզոյանը հավելեց, որ ՔԿՀ-ներում կոմունալ-կենցաղային պայմանները սարսափելի են եղել, ջրամատակարարման եւ ջրահեռացման ցանցերում վերանորոգման աշխատանքներ չեն իրականացվել, կոյուղագծերը գտնվում են վթարային վիճակում եւ ամառային ամիսներին վթարվելու դեպքում կարող են հակասանիտարական ու համաճարակային իրավիճակներ առաջացնել, և այս որոշմամբ որոշակի բարելավում է նախատեսվում:

Որոշումն ընդունվեց: