Վրաստանի վարչապետի կողմից շատ ամբիցիոզ ծրագիր է առաջարկվել. Փաշինյան

Տեղեկացրել էինք, որ այսօր պաշտոնական այցով Երևան է ժամանել Վրաստանի նորընտիր վարչապետ Մամուկա Բախտաձեն, ով հանդիպել է վարչապետ Նիկոլ Փաշինյանի հետ:

Համատեղ ասուլիսի ժամանակ ՀՀ վարչապետ Նիկոլ Փաշինյանը նշեց, որ այսօր շատ կարևոր խոսակցություն են ունեցել Բախտաձեի հետ և երկու երկրների հետագա համագործակցության վերաբերյալ բավականին հավակնոտ խնդիրներ ձևակերպել:

«Մենք խնդիր ունենք տնտեսական կոմպոնենտը համապատասխանեցնելու մեր հարաբերությունների բովանդակային մակարդակին: Համատեղ քննարկել ենք տրանսպորտային, տնտեսական և քաղաքական փոխգործակցության հարցեր: Վրաստանի վարչապետի կողմից շատ ամբիցիոզ ծրագիր է առաջարկվել, և մենք լիովին պաշտպանում ենք այդ ծրագիրը: Առաջիկա տարիների ընթացքում նախատեսվում է առևտրաշրջանառությունը հասցնել 1 մլրդ դոլարի մակարդակի, և սա թեմա է, որի նկատմամբ բոլորս կարող ենք դիրքավորվել, ունենալ ճանապարհային քարտեզ»,- ասաց Փաշինյանը:

Նա տեղեկացրեց նաև, որ առաջիկայում տեղի կունենա հայ-վրացական միջկառավարական հանձնաժողովի նիստ: