Ծեծի ենթարկվածն աշխարհի չեմպիոնի հայրն է. մանրամասներ «Օլիմպավան»-ում կատարվածից

Հայտնել ենք, որ այս գիշեր ձերբակալվել է ՀԱՕԿ նախագահ Գագիկ Ծառուկյանի անվտանգության ծառայության պետ Էդուարդ Բաբայանը:

Yerkir.am-ի տեղեկություններով` Բաբայանը ձերբակալվել է Երևանի Դավթաշեն վարչական շրջանում գտնվող Օլիմպիական ավանում տեղի ունեցած միջադեպի գործով: Ըստ լուրերի` միջադեպը տեղի է ունեցել Գագիկ Ծառուկյանի և բռնցքամարտի ֆեդերացիայի մարզիչների հավաքից հետո: Քննարկման թեման եղել է բռնցքամարտի ֆեդերացիայի նախագահի ընտրությունը:

Մեր տեղեկություններով` հավաքին ներկա են եղել նաև ՀԱՕԿ գլխավոր քարտուղար Հրաչյա Ռոստոմյանը, ՀԱՕԿ նախագահ Գագիկ Ծառուկյանի անվտանգության ծառայության պետ Էդուարդ Բաբայանը: Ըստ շրջանառվող լուրերի` Բաբայանը վեճի է բռնվել բռնցքամարտի աշխարհի չեմպիոն Նիկոլ Հարությունովի հոր՝ բռնցքամարտի մարզիչ` 50-ամյա Վյաչեսլավ Հարությունովի հետ, ապա` ծեծի ենթարկել նրան: Դեպքից հետո Հարությունովին տեղափոխել են հիվանդանոց:

Yerkir.am-ի տեղեկություններով` տուժածն այժմ գտնվում է «Արմենիա» ԲԿ-ի վերակենդանացման բաժանմունքում: Մեր այցելության պահին Հարությունովի հիվանդասենյակում հսկողություն էին իրականացնում իրավապահները: Մեզ հայտնի դարձավ, որ այս ընթացքում Ծառուկյանի աշխատակիցներից եկել և փորձել են հաշտվել տուժածի հետ, սակայն նրանց թույլ չեն տվել մտնել բաժանմունք:

«Արմենիա» ԲԿ-ի վերակենդանացման բաժանմունքի ծառայության ղեկավար Արա Ղազարյանը մեզ հայտնեց, որ Հարությունովն իրենց մոտ ընդունվել է երեկ` ժամը 20:40-ի սահմաններում, տրավմա, սուր շնչառական անբավարարություն ախտորոշմամբ: «Արվել են համապատասխան հետազոտություններ: Այս պահին հիվանդի վիճակը կայուն է, գիտակցությունը տեղն է, հնարավոր է վաղը տեղափոխվի պալատ»,- ասաց նա:

Yerkir.am-ի հետ զրույցում տուժածի մյուս որդին` Ռոբերտը, նշեց, որ դեպքի մասին ոչինչ չգիտի: «Ես պապային երեկ եմ տեսել, տանն էր, նորմալ էր ամեն ինչ: Թե հետո ի՞նչ է եղել, չգիտեմ: Երեկոյան հիվանդանոցից ինձ զանգահարեցին, ասացին` եկեք հիվանդանոց: Անմիջապես եկանք հիվանդանոց, տեսանք` ոստիկանները լցված են: Իմացանք, որ հորս վիճակը բարդ էր, բայց կայուն էր: Հիմա խիստ հսկողություն է, մոտը 5 հոգի մարդ կա, թույլ չեն տալիս մտնել մոտը»,- ասաց նա:

Նշենք, որ տուժածի մյուս որդին` բռնցքամարտի աշխարհի երիտասարդական առաջնության հաղթող Նիկոլ Հարությունովը, հանրապետությունում չէ:

Միջադեպիմասին տեղեկություն ստանալու համար փորձեցինք կապ հաստատել ՀԱՕԿ գլխավոր քարտուղար, ներկայումս արտակարգ իրավիճակների նախարարի պաշտոնը զբաղեցնող Հրաչյա Ռոստոմյանի հետ, սակայն նրա հեռախոսահամարներն անջատված էին: