Մենք փակ բաժնետիրական ընկերություն չենք. ՌԴ-ում Հայաստանի դեսպանը խոստանում է «հասանելի» լինել

ՌԴ-ում Հայաստանի դեսպանատունը մտադիր է ակտիվացնել աշխատանքը սոցցանցերում և համագործակցել բլոգերների հետ, քանի որ երիտասարդները շատ ակտիվ են սոցիալական կայքերում. այսօր լրագրողներին հայտնեց ՌԴ-ում Հայաստանի արտակարգ և լիազոր դեսպան Վարդան Տողանյանը։

Նա տեղեկացրեց նաև, որ արդեն իսկ սոցցանցերում դեսպանատան պաշտոնական էջեր են բացվել։ «Մենք հնարավորինս բաց կլինենք ինչպես ռուսական, այնպես էլ հայկական ԶԼՄ-ների համար, կփորձենք աշխատել բաց ու թափանցիկ: Մենք փակ բաժնետիրական ընկերություն չենք, և եթե կլինեն ձեզ հուզող հարցեր, կարող եք անմիջապես մեզ դիմել»,- ասաց Տողանյանը:

Հարցին, թե ինչպե՞ս կգնահատի իր նախկինի` Օլեգ Եսայանի աշխատանքը, Տողանյանը պատասխանեց, որ իրականում դեսպանների աշխատանքը բավական դժվար գնահատելի աշխատանք է, մասնավորապես` հանրության համար: «Այս տարիներին հայ-ռուսական հարաբերությունների զարգացմանը նպաստող մեծ աշխատանք է կատարվել, բայց գնահատել նախկին դեսպանի աշխատանքը` էթիկապես ճիշտ չի լինի»,- ասաց նա: