Դավիթ Համբարձումյանը շատ համեստ, հանգիստ, խելոք տղա ա, հիմա Ռեմբոյի արկածներից եք պատմում ոնց որ. Մուրադ Մուրադյան

Երբ ապացուցվի, թե Մասիսի քաղաքապետն ու նրա տեղակալը որևէ մեկին  ապտակել են, մի հատ քար են նետել, ՀՀԿ-ական պատգամավոր Մուրադ Մուրադյանն էլ այդ կարծիքին կլինի: Այդ մասին նա ասաց խորհրդարանում լրագրողների հետ զրույցում:

Հիշեցնենք, որ երեկ ձերբակալվել են Մասիսի քաղաքապետ Դավիթ Համբարձումյանը և նրա օգնականը` ապրիլի 22-ին Էրեբունի վարչական շրջանում տեղի ունեցած անկարգությունների դեպքի առթիվ Երեւան քաղաքի քննչական վարչության վարույթում քննվող քրեական գործով:

Ի դեպ, ՀՀԿ-ական մի շարք պատգամավորներ երաշխավորագիր էին ստորագրել նրանց բաց թողնելու համար, որում ասվում է, թե ձերբակալվածները չեն խոչընդոտի քննությանը: Այդ պատգամավորներից է նաև Մուրադ Մուրադյանը, ով քաղաքապետի մտերիմն է և համագյուղացին:

Հարցին՝  հանիրավի՞ են մեղադրել քաղաքապետին, նա պատասխանեց, որ այսօր ամեն ինչ պարզ կդառնա, այսօր լրանում է ձերբակալման 72 ժամը, կլինի դատական նիստ, և ամեն ինչ պարզ կդառնա:

«Ես Դավիթ Համբարձումյանին ճանաչում եմ ծնված ժամանակվանից: Եես միակ պաշտոնյան եմ երևի էս երկրում, որ ապրել և ապրում եմ գյուղում: Դավիթ Համբարձումյանը շատ համեստ, հանգիստ, խելոք տղա ա, հիմա Ռեմբոյի արկածներից եք պատմում ոնց որ: Ես զարմանում եմ, որ ինքն այդքան բանի ընդունակ ա: Կարող եք ամբողջ բնակչությանը հարցնել, թե Դավիթ Համբարձումյանն ինչպիսի քաղաքապետ է եղել, և նախկիններն ինչպես են աշխատել, կարող եք գնալ ու ժողովրդից հարցնել»,- ասաց նա:

Մուրադյանը նշեց, որ օբյեկտիվ քննություն է ուզում: «Այսօրվա դրությամբ ոչ մի փաստ ես չեմ տեսել, չեմ լսել նրա մեղավորության մասին, եթե կլինի, կտեսնենք: Պատգամավորների խնդրանքն ընդամենը եղել է այն, որ երաշխավորել ենք, որ երբ նա դուրսը մնա, քննությանը չի խոչընդոտի»,- պարզաբանեց պատգամավորը՝ խորհուրդ տալով մինչև երեկո համբերել, և ամեն ինչ պարզ կլինի:

Նա մեկ անգամ ևս շեշտեց, որ Դավիթ Համբարձումյանին լավ է ճանաչում, նա ընդունակ չէ նման բաների, որ վերագրում են նրան: «20 հոգի խաչմերուկ էին փակում, տեղյակ էիք, հիմա տեղյակ չե՞ք, որ հազարավոր մարդիկ քաղաքապետի համար ճանապարհ են փակում: Գնացեք, հարցրեք՝ խի՞ են փակում»,- ասաց պատգամավորը:

Նա նշեց, որ իր ու իր ընտանիքի մասին էլ էին լրագրողները շատ բաներ գրում: «Բա խի՞ կրվան դատարանում այդ լրագրողները: Նարկոտիկի, բանի մասին գրում էին: Էն վախտ սաղ Հայաստանն իմացավ, որ ես յանիմ նարկոտիկ էի օգտագործում, երեխու մասին ինչ ասես գրեցիք, ես էլ ասեցի լրագրողներին, որ էդ պատվիրատուի ծնողներն են նարկոման: Ո՞ւմ ա պետք, եթե հիմա հերքել եք, էսի արդարությո՞ւն ա: Ես էլ կարամ իրանց մասին շատ բան ասեմ, հետո ասեմ՝ հերքում եմ, ճի՞շտ ա դա: Դրա համար ասում եմ՝ մեկ օր համբերենք, էլի: Ես ձեզ չասեցի` ինքը 100% արդար ա, 100% մեղավոր ա, բայց ես չեմ հավատում, որ ինքը էդքան բանի ընդունակ ա: Ես կյանքում ձեռս սիգարետ չեմ բռնել, բայց նենց բաներ գրեցիք` յանի սաղ օրը մեր տուն նարկոտիկ են բերել»,- ասաց Մուրադյանը: