«Հյուսիս-հարավ» ծրագրում կոռուպցիոն խնդիրներ կան. ոստիկանությունն ու ՊԵԿ-ը կանցնեն գործի

Այսօր կառավարության նիստում, օրակարգին անցնելուց առաջ, վարչապետ Նիկոլ Փաշինյանը խնդրեց փոխվարչապետ Տիգրան Ավինյանին` զեկուցել Հյուսիս-հարավ մայրուղու ճանապարհաշինարարության ընթացքի վերաբերյալ:

Տիգրան Ավինյանը նշեց, որ ճանապարհաշինարարության մեջ ներգրավված չինական ընկերության հետ կապված խնդիր կա,  և առաջարկվող լուծումներից մեկն այդ ընկերության հետ պայմանագրի կասեցումն է, սակայն Ավինյանը չի կարծում, որ դա արդյունավետ լուծում է: Նա հավելեց, որ կան կոռուպցիոն խնդիրներ ևս, ուստի ուսումնասիրություններ են պետք` համապարփակ պատկերը հասկանալու համար:

«Կոռուպցիոն խնդիրը երկար տարիների պատմություն ունի և մանրամասն պետք է ուսումնասիրել: ՊԵԿ-ի ու ոստիկանության հետ պետք է խորանանք այս խնդրի մեջ»,- ասաց Ավինյանը:

Վարչապետը նշեց, որ այդտեղ էլ պետք է տան արագ և արդյունավետ լուծումներ, քանի որ երկու տարի է` այդ խնդիրը շրջապտույտի մեջ է, մանավանդ, որ Հյուսիս-հարավի կառուցումը պայմանավորում է Իրանի ու Վրաստանի հետ Հայաստանի տնտեսական հարաբերությունների զարգացումը: Ուստի առավելագույնս արագ պետք է աշխատեն, որ այդ հատվածում` Տրանշ-2, Տրանշ-3 հատվածներում, շինարարությունը վերականգնվի: