Մենք այլ մոտեցումներ և այլ կարծիքներ ունենք Հայաստանի հետ համագործակցության մասին. Դեմետրիս Սիլուրիս

Պաշտոնական այցով Հայաստանում է Կիպրոսի Հանրապետության Ներկայացուցիչների պալատի նախագահ Դեմետրիս Սիլուրիսը: Այսօր խորհրդարանում տեղի է ունեցել Սիլուրիսի և ՀՀ ԱԺ նախագահ Արա Բաբլոյանի մամուլի ասուլիսը:

Անդրադառնալով Հայաստանում տեղի ունեցած իշխանափոխությանը` Սիլուրիսը հայտարարեց, որ իրենք ուզում են ուժեղ Հայաստան, որի հիմքում է Հայաստանի մեծ և հարուստ պատմությունը, քաղաքակրթությունը և մշակույթը:

«Հայաստանը մեզ համար մեկն է: Մենք այլ մոտեցումներ և այլ կարծիքներ ունենք Հայաստանի հետ համագործակցության մասին: Մենք որևէ կուսակցական կամ որևէ այլ մոտեցում չունենք մեր համագործակցության մեջ»,- նշեց Սիլուրիսը։

Հարցին՝ արդյո՞ք ՀՀ վարչապետ Նիկոլ Փաշինյանի հետ հանդիպում նախատեսվում է, նա պատասխանեց. «Մեր ծրագիրը հայտնի է»:

Նշենք, որ ՀՀ Ազգային ժողովում տեղի է ունեցել ՀՀ ԱԺ և Կիպրոսի ԱԺ պատգամավորների հանդիպումը: Մայիսի 22-ին` ժամը 08:45-ին, Կիպրոսի Հանրապետության Ներկայացուցիչների պալատի նախագահի գլխավորած պատվիրակությունը կայցելի Ծիծեռնակաբերդ` Հայոց ցեղասպանության զոհերի հուշահամալիր: