85.7 տոկոսի կարծիքով՝ հեղափոխությունը կազմակերպված չէր ոչ մի երկրի կողմից՝ հայկական նախաձեռնություն էր. հարցում

Տեղեկացրել էինք, որ «GALLUP International association»-ի` Հայաստանում լիիրավ անդամ «Էմ Փի ՋԻ» ՍՊԸ-ն հարցում է անցկացրել՝ պարզելու քաղաքացիների կարծիքը թավշյա հեղափոխության և հետագա անելիքների վերաբերյալ:

Ընկերության տնօրեն Արամ Նավասարդյանը լրագրողների հետ զրույցում նշեց, որ հարցումն իրականացվել է հեռախոսային զրույցի միջոցով, և հարցմանը մասնակցել է 809 քաղաքացի:

Հարցին՝ ինչպե՞ս են գնահատում Նիկոլ Փաշինյանի նոր կերպարը /չսափրված, գլխարկով, ուսապարկով/, հարցման մասնակիցների 90.8 տոկոսը պատասխանել է՝ դրական, իսկ 3.6 տոկոսը՝ բացասակա: Հարցին դժվարացել է պատասխանել հարցվածների 5.7 տոկոսը:

Մեկ այլ հարցի, թե ի՞նչ են կարծում՝ ում, որ երկրի կողմից էր նախաձեռնված և կազմակերպված հեղափոխությունը, հարցման մասնակիցների գերակշիռ՝ 85.7 տոկոսը պատասխանել է, որ սա կազմակերպված չէր ոչ մեկի կողմից, սա զուտ հայկական նախաձեռնություն էր: Սակայն հարցման մասնակիցների 2.1 տոկոսի կարծիքով էլ ԱՄՆ-ն է կանգնած այս ամենի հետևում, իսկ 1.2 տոկոսի կարծիքով՝ ՌԴ-ն:

«Մենք հետաքրքրվել ենք նաև, թե համաձա՞յն են հեղափոխության, համակարգի նման ձևաչափով փոփոխության հետ, և հարցման մասնակիցների 97 տոկոսը պատասխանել է՝ այո, և միայն 1.7 տոկոսն է պատասխանել, որ համաձայն չէ: Իսկ հարցին, թե Փաշինյանին կհաջողվի՞ առաջիկա 6 ամսից 1 տարվա ընթացքում լուծել ՀՀ-ի առջև կանգնած հիմնախնդիրները, հարցվածների 77.9 տոկոսը պատասխանել է, որ` այո, իսկ 14.8 տոկոսը՝ ոչ»,- ասաց Նավասարդյանը: