Առաջին քայլը լինելու է ընտրական համակարգի փոփոխությունը. Նիկոլ Փաշինյան

ՀՀ վարչապետ ընտրվելուց հետո Նիկոլ Փաշինյանը լրագրողների հետ զրույցում ասաց, որ աշխատանքային մթնոլորտում քննարկումներ կունենան՝ հաշվի առնելով ընթացիկ քաղաքական իրավիճակի առանձնահատկությունները: «Մենք ասում ենք` համերաշխություն, դա չի կարող ուղղակի կարգախոս լինել»,- նշեց նա:

Նոր կառավարության պաշտոնյաների անուններ Փաշինյանը չնշեց՝ ասելով, որ բազմաթիվ թեկնածուներ կան, սակայն դեռ պիտի քննարկել: «Իհարկե, էական փոփոխություններ կլինեն կառավարության կազմում»,- հայտարարեց նա:

Հարցին` պաշտպանության նախարարի փոփոխության անհրաժեշտություն տեսնո՞ւմ է, Փաշինյանն արձագանքեց. «Այո, տեսնում եմ»:

Նա նաև հույս հայտնեց, որ մայիսի 14-ին երկկողմ հանդիպում կլինի ՌԴ նախագահ Վլադիմիր Պուտինի հետ:

Հարցին, թե ՀՀԿ-ն կլինի՞ կառուցողական ընդդիմություն, Փաշինյանը պատասխանեց. «Կարծում եմ՝ բոլորս էլ կլինենք կառուցողական ու հաջողության կհասնենք»: «Առաջին ամենակարևոր քայլը ընտրական համակարգի բարեփոխումների մեկնարկն է»,- հավելեց նա:

Փաշինյանը հայտարարեց, որ իր առաջին քայլը լինելու է անվտանգության մարմինների զեկույցների լսումը և ընտրական համակարգի փոփոխությունը, ապա հավելեց, որ սուպերվարչապետական համակարգ չպետք է լինի, և այդ ուղղությամբ ևս փոփոխություններ են լինելու:

Փաշինյանը նաև ասաց, որ վաղը մեկնելու է Արցախ: