Հուսով եմ` որևէ մեկի մտքով չի անցնում, որ դա կարող էր կեղծված տեսանյութ լինել. Վիգեն Սարգսյան

Պաշտպանության նախարար Վիգեն Սարգսյանը հուսով է, որ որևէ մեկի մտքով չի անցնում, որ ՊՆ-ն կարող էր կեղծված տեսանյութ տարածել: Լրագրողների հետ հանդիպման ժամանակ, անդրադառնալով ՊՆ-ի տարածած այն տեսանյութին, որում երևում է, որ շփման գծում նկատվել է հակառակորդի ուժի և տեխնիկայի կենտրոնացում, նա ասաց.  «Ես ո՞նց կերևամ, որպես պաշտպանության նախարար, իմ անձնակազմի առջև, ո՞նց կերևա ՊԲ հրամանատարը իր անձնակազմի առջև, եթե փորձի հին կադրերը նորի տեղ ցույց տալ: Չէ՞ որ մենք, հանրային կարծիքից բացի, ունենք նաև մեր անմիջական հասարակության վստահության և ամրության խնդիր: Ո՞վ կարող է ենթադրել, որ պաշտպանության նախարարը կարող է մանիպուլյացիայի ենթարկել իր հասարակության սպայական անձնակազմի կարծիքը` հանրային կարծիքի վրա ազդելու համար, նա ուղղակի չի պատկերացնի` ինչ բան է  բանակը»,- ասաց նախարարը:

Միևնույն ժամանակ նա նշեց, որ ՊՆ կոլեգիան չէր կարող լռել և հայտարարություն չտարածել, դա ահազանգ կլիներ, որ ՊՆ-ն ինչ-որ բան թերի է անում: «Մեզ ներքին գործընթացներն անհանգստացնում են, որովհետև մենք այս երկրի քաղաքացի ենք, բայց մեր գործառույթը մյուսն է, և դա մենք պետք է նշենք»,- նշեց Սարգսյանը: