Ինչո՞ւ նախկինների ժամանակվա ընտրությունները համարում էիք կեղծված, իսկ ներկաների ժամանակ չեք խոսում կեղծված ընտրությունների մասին․ Նաիրի Հոխիկյան

Մեդիափորձագետ Նաիրի Հոխիկյանը գրում է.

«Մինչև 2018-ը Հայաստանում տեղի ունեցած նախագահական և խորհրդարանական ընտրությունների ժամանակ մարդիկ համատարած խոսում էին բաժանվող ընտրակաշառքի և իշխանությունների կողմից կիրառվող վարչական լծակների մասին։

Մարդիկ վստահ էին, որ իշխանությունները լեգիտիմ չեն, քանի որ ձայների համար փող է բաժանվել։

2018-ից հետո ի՞նչ է փոխվել։ Արդյո՞ք գործող իշխանությունը ընտրակաշառք չի բաժանել կամ արդյո՞ք վարչական լծակներով ձայներ չի բերել։

Ինչո՞ւ նախկինների օրոք ժողովդին չէին մեղադրում իշխանության երկարակեցության համար և համարում էին, որ ժողովուրդը կապ չունի իշխանության վերընտրվելու հետ, իսկ ներկաների օրոք ժողովուրդն է մեղավոր, որ չարիքը մնում է։

Ինչո՞ւ նախկինների ժամանակվա ընտրությունները համարում էիք կեղծված, իսկ ներկաների ժամանակ չեք խոսում կեղծված ընտրությունների մասին։

Գուցե կեղծիքների տեխնոլոգիանե՞րն են փոխվել։

Նախկինում 5000 դրամը դնում էին մարդու գրպանն ու ասում՝ կընտրես մեզ, իսկ ներկայում աղքատ մարդուն կանչում են գյուղապետարան ու 10,000 դրամ դնելով գրպանը՝ ասում, որ նախկինների թալանածը հետ ենք բերելու և ձեզ բաժանելու, եթե մեզ ընտրեք։

Ժողովրդին մի մեղադրեք չարիքին ընտրելու համար։ Նիկոլ Փաշինյանին ընտրել են այն նույն մարդիկ, ովքեր նախկինում նույն բանի դիմաց ընտրում էին Սերժ Սարգսյանին»։