Որևէ մեկի մտքով թող չանցնի, թե մենաշնորհների խնդիրը հեշտ է լուծել` թարս նայելով կամ գրչի մեկ հարվածով. Արծվիկ Մինասյան

Այսօր լրագրողների հետ զրույցում էկոնոմիկայի նախարարի պաշտոնակատար Արծվիկ Մինասյանն անդրադարձավ Հովիկ Աբրահամյանի հրաժարականին և դրա պատճառներին: Նա նախ կարծիք հայտնեց, որ սահմանադրական նորմերը կյանքի կոչվելուց հետո միայն որոշ խնդիրներ կստանան իրենց լուծումները: Սակայն դա 1 կամ 2 օրում չի լինի, դրանք պահանջում են հետևողական ու քրտնաջան աշխատանք: Իսկ այս պահի դրությամբ օրենսդրական դաշտում իրականացվում է մեծածավալ աշխատանք:

«Որևէ մեկի մտքով թող չանցնի, որ մենաշնորհների կամ շուկաների գերկենտրոնացվածության խնդիրը հեշտ է լուծել` մեկ թարս նայելով կամ գրչի մեկ ստորագրությամբ: Այդքան հեշտ որ լիներ, շատ զարգացած երկրներ չէին ունենա այդ խնդիրը»,- ասաց Արծվիկ Մինասյանը:

Ինչ վերաբերում է հարցին, թե արդյո՞ք վարչապետի հրաժարականը անակնկալ չէր, Արծվիկ Մինասյանը պատասխանեց, որ որևէ նախարարի, առհասարակ, նախապես չեն ասում, որ վարչապետը պետք է հրաժարական տա, մանավանդ, որ այդպիսի քննարկում կառավարությունում չի եղել: Վարչապետի հրաժարականն ինքնին նշանակում է կառավարության հրաժարական, և նախարարները, ըստ Սահմանադրության, շարունակելու են իրենց գործունեությունը, քանի դեռ նախագահի կողմից նոր հրամանագիր չի ստորագրվում: Եվ այդ առումով, ըստ Արծվիկ Մինասյանի, դա ցանկացած նախարարի համար կարող է անակնկալ լինել:

Ինչ վերաբերում է Կարեն Կարապետյանի կողմից երկու փուլով` կարճաժամկետ ու երկարաժամկետ  ծրագրով ներկայանալու փաստին, Արծվիկ Մինասյանը ողջունեց այդ հանգամանքը` նոր վարչապետն արդեն պատրաստ ծրագրով է անցնում աշխատանքի, քանի որ լուրջ վերանայումների անհրաժեշտություն կա: Միևնույն ժամանակ, դա չի նշանակում, որ մինչ այժմ գործող կառավարությունն ու վարչապետը սխալ էին վարվում, այլ նոր մարտահրավերներին համապատասխան արագ մի քանի գործողություններով պետք է վերականգնել ժողովրդի հավատն ու տնտեսական որակական ցուցանիշները:

Արծվիկ Մինասյանը նոր վարչապետի մասին ասաց, որ նա պրոֆեսիոնալ մենեջեր էր, երբ Երեւանի քաղաքապետն էր: Նա հույս հայտնեց, որ  կարճ ժամանակ հետո  տնտեսական կյանքում ականատես կլինենք ցուցանիշների բարելավումների: