Ծեծի ենթարկված լրագրող Տիրայր Մուրադյանը գլխի սալջարդ է ստացել

Լրագրող Տիրայր Մուրադյանը նշում է, որ ՀՀ կառավարության 3-րդ մասնաշենքի մոտ իր մասնագիտական պարտականությունները կատարելիս ծեծի է ենթարկվել:

«Կառավարության շենքի մոտ ես անձանց ֆիքսեցի, որոնց վարքագիծը տարօրինակ էր, իրենք իրենց հավաքի մասնակիցների պես չէին պահում: Երբ իրենք նկատեցին, որ իրենց եմ ֆիքսում, տեսադաշտից գնացին, բայց մի քանի րոպե հետո անսպասելի հայտնվեցին՝ ասելով՝ ինչո՞ւ ես նկարում ու սկսեցին հարվածել»,- «Ազատության» հետ զրույցում ասաց լրագրողը:

Տիրայր Մուրադյանն այս պահին գտնվում է «Սուրբ Գրիգոր Լուսավորիչ» ԲԿ-ում: Հիվանդանոցի վերակենդանացման բաժանմունքի վարիչ Սամվել Կարապետյանը լրագրողներին հայտնեց, որ Տիրայր Մուրադյանը ստացել է գլխի փափուկ հյուսվածքների սալջարդ ձախ քունք-ծոծրակային հատվածում: Նա նշեց, որ տուժածը պետք է մնա բժիշկների հսկողության տակ: