Միշտ էլ հաճելի է լինել առաջինը. Մխիթարյան

Հայաստանի ազգային հավաքականի ավագ Հենրիխ Մխիթարյանն այսօր ստացավ տարվա լավագույն ֆուտբոլիստի մրցանակը, որից հետո պատասխանեց լրագրողների հարցերին:

«Միշտ էլ հաճելի է լինել առաջինը, եւ այսօր էլ մեծ հաճույքով ստացա այս մրցանակը: Կփորձեմ հաջորդ տարիների ընթացքում ևս լինել առաջինը` իհարկե, հարգելով իմ թիմակիցներին»,- ասաց նա:

Անդրադառնալով առաջիկա ընկերական խաղերին` Մխիթարյանը նշեց. «Ընկերական խաղերից առաջ տրամադրվածությունը  շատ բարձր է: Փորձելու ենք հաղթել այդ խաղերում: Նորբերտո Բալեկյանի մասին շատ լավ կարծիք ունեմ, շատ լավ է հարմարվում թիմի մարզումներին»:  

Հավաքականի ավագը խոսեց նաեւ Լոնդոնի «Արսենալ»-ում հարմարվելու ընթացքի մասին. «Արսենալ»-ում փորձել եմ հնարավորինս շուտ հարմարվել  մարզումներին եւ քաղաքին: Միշտ էլ դժվարություններ լինում են, բայց շնորհակալ եմ թիմակիցներիս, որ օգնեցին ինձ շուտ հաղթահարել այդ շրջանը: Հույս ունեմ` էլ ավելի մեծ օգուտ կտամ թիմին»,- ասաց նա: