Ախթալայի պոչամբարում հայտնաբերվել են որոշ խախտումներ, որոնց համար նախատեսված է համարժեք պատասխանատվություն. Արծվիկ Մինասյան

Կառավարության նիստից հետո լրագրողների հետ ճեպազրույցում բնապահպանության նախարար Արծվիկ Մինասյանն անդրադարձավ համացանցում տարածված այն տեսանյութին, որ Ախթալայի պոչամբարից ինչ-որ նյութ է թափվում Դեբեդ գետը:

Նախարարը նշեց, որ ստուգումները Ախթալայի հանքավայրում շարունակվում են, իսկ տեսչական մարմինը տեսանյութը հրապարակողից և կազմակերպությունից պահանջել է համապատասխան փաստերի ներկայացում, որովհետև եթե կա այդպիսի դեպք, որը չի արձանագրվել ստուգման ընթացքում, ուրեմն համապատասխան պատասխանատվության պետք է ենթարկվեն համապատասխան կազմակերպության ներկայացուցիչները:

Մինասյանի խոսքով` թափվող հեղուկը լաբորատոր փորձաքննության կենթարկվի, որից հետո տեսչական մարմինը հանդես կգա հստակ տեղեկատվությամբ:

«Միջանկյալ ստուգումների ընթացքում, այո, հայտնաբերվել են մի շարք խախտումներ, որոնց համար դրա մեղավորները կենթարկվեն համարժեք պատասխանատվության: Նաև կլինի հանձնարարական, որպեսզի միջոցներ ձեռնարկվեն հետագայում նման խախտումները բացառելու ուղղությամբ»,- ասաց Արծվիկ Մինասյանը: