2 աշակերտի Վ. Բազմաբերդի դպրոց տեղափոխման համար հատկացվել է փոխադրամիջոց

Փետրվարի 14-ին Արագածոտնի մարզպետ Աշոտ Սիմոնյանի մոտ կայացած խորհրդակցությանը քննարկվեցին աշխատանքային ընթացիկ հարցեր: Ստորաբաժանումների ղեկավարները ներկայացրին կառավարության, պետական գերատեսչությունների կողմից ստացված հանձնարարությունների կատարման ընթացքը: Մասնավորապես անդրադարձ եղավ Մեծաձորի դպրոցի լուծարմանը: Նշվեց, որ գործընթացը բնականոն հունի մեջ է: Դպրոցի երկու աշակերտի՝ Վ. Բազմաբերդի դպրոց  տեղափոխման համար հատկացվել է փոխադրամիջոց:

Քննարկվեցին նաեւ  հանրությանը հաշվետվություններ ներկայացնելու համար ժամանակացույց կազմելու, Աշտարակի Վ. Պետրոսյանի անվան դպրոցի վերանորոգչական աշխատանքների ընթացքի, 2017 թվականի դեկտեմբերի 26-ին ՀՀ Վարչապետի մոտ կայացած խորհրդակցության արձանագրությամբ տրված հանձնարարականների, այդ թվում՝ զբոսաշրջության 30 ծրագրի ներկայացման մասին հարցերը:

Աշոտ Սիմոնյանը հարցադրումներ կատարեց նախորդ խորհրդակցությանը  իր կողմից տրված հանձնարարականների վերաբերյալ: Անդրադառնալով   տարեկան գործունեության ծրագրի կազմմանը՝ նա  հանձնարարեց հստակ ներկայացնել գործողությունների ժամկետները՝ ըստ ամիսների, նշել պատասխանատուներին եւ հետեւել դրանց կատարմանը:

Անդրադարձ եղավ նաեւ կրթության ոլորտին: Ըստ մարզպետի՝ այստեղ լրջագույն աշխատանքներ կան կատարելու: Դրանք առնչվում են ինչպես տարիֆիկացիաների կազմմանը,  բյուջեների բաշխմանն ու վարձատրության մեջ սոցիալական արդարության ապահովմանը,  այնպես էլ՝ կրթության որակի բարձրացմանը, ինչը  ոլորտի գերակա խնդիրն է:  Այդ ամենին հասնելու  համար մարզպետի հանձնարարականն էր՝ մշակել գործունեության հստակ սկզբունքներ, լրջորեն եւ սրտացավորեն մոտենալ կուտակված խնդիրների լուծմանը:

-Բոլորիս նպատակը բովանդակային եւ ճիշտ աշխատաոճ մշակելն է,-ընդհանրացնելով խոսքը եւ դիմելով ոլորտների պատասխանատուներին՝ ասաց Աշոտ Սիմոնյանը եւ հորդորեց, որպեսզի նրանք նույն մոտեցումը դրսեւորեն իրենց ստորաբաժանումների աշխատակիցների հանդեպ:

Քննարկված հացերի վերաբերյալ մարզպետը նոր հանձնարարականներ տվեց:

ՀՀ Արագածոտնի մարզպետարանի տեղեկատվության եւ հասարակայնության հետ կապերի բաժին