Կլինի 18 նախարար, որոնք կերդվեն պաշտոնի անցնելուց առաջ

Կառավարության նիստում արդարադատության նախարար Դավիթ Հարությունյանը ներկայացրեց որոշման նախագիծ, որը վերաբերում է պետական պաշտոններ զբաղեցրած անձանց սոցիալական երաշխիքներին: Սահմանվում են վարչապետին, նախագահին և ԱԺ նախագահին տրամադրվող պահուստային ֆոնդի չափերը, նախագահի համար` 75 միլիոն դրամ, ԱԺ նախագահի համար` 50 միլիոն դրամ, վարչապետի համար` 150 միլիոն դրամ:

Սահմանվում է նրանց աշխատակազմերի աշխատակիցների առավելագույն թվաքանակը. նախագահի պարագայում` 180, վարչապետի պարագայում` 600:

Կան նաև մի քանի նոր կարգավորումներ` կապված պետական պաշտոններ զբաղեցնող անձանց` կենսաթոշակի անցնելու հետ:

Նախարարը ներկայացրեց նաև «Կառավարության կառուցվածքի և գործունեության մասին» Հայաստանի Հանրապետության օրենքի նախագիծը: Կառավարությունը բաղկացած է լինելու վարչապետից, առաջին փոխվարչապետից, երկու փոխվարչապետերից, նախարարներից: Նախատեսվում է կառավարության ցանկում ընդգրկել 18 նախարություն: Նախարարները երդում են տալու պաշտոնին անցնելուց առաջ: