«ՀՀ-ի համար լրտեսություն անողներին անզգայացում չի հասնում». Լապշինը պատմել է բանտի բժիշկների մասին

Ռուսաստանցի-իսրայելցի բլոգեր Ալեքսանդր Լապշինը հարցազրույց է տվել ադրբեջանական Turan TV հեռուստաալիքին և պատմել Բաքվի բանտում անցկացրած օրերի ու բժիշկների կողմից ցուցաբերված վերաբերմունքի մասին:

Նրա խոսքով` բանտում եղած ժամանակ նա ատամների հետ կապված խնդիրներ է ունեցել, և բլոգերի ատամները բուժել են առանց անզգայացնող միջոցների՝ ասելով, թե «ՀՀ-ի համար լրտեսություն անողներին անզգայացում չի հասնում»:

«Դա շատ ցավալի ու տհաճ էր, մանավանդ, որ ես լրտես  չեմ, և նման թեմաներով կատակները համարում եմ ոչ տեղին»,- գրել է Լապշինը:

Նա նաև պատմել է, որ բանտում եղած ժամանակ հարևան բանտախցերի կալանավորները պարբերաբար իրեն անվանել են «հայերի մարմնավաճառ» և սպառնացել հաշիվներ մաքրել իր հետ: