1600 աշակերտություն ունեցող թուրքական դպրոցում բուֆետ չկա. երեխաները սնվում են` գետնին նստած

Ներկայիս Թուրքիայի տարածքում գտնվող Ուրֆա նահանգի Գյոբեքլիքթեփե միջնակարգ դպրոցում աշակերտները գետնին նստած են սնվում: Ըստ Demokrathaber-ի՝ պատճառն այն է, որ 1600 աշակերտություն ունեցող դպրոցում բուֆետ չկա:

Գյոքթեփ շրջանի թաղապետ Հուսեյին Յալչընը նշել է, որ այդ կարևոր հարցը բազմիցս բարձրացվել է կրթության նախարարության, նահանգապետարանի, քաղաքապետարանների կամ այլ կառույցների մոտ, սակայն այդպես էլ լուծում չի ստացել: Նա իր խոսքերի ճշմարտացիությունն ապացուցելու նպատակով լուսանկար է տեղադրել համացանցում, որը մեծ աղմուկ է բարձրացրել:

«Ամեն տեղ դիմեցինք, սակայն դպրոցում բուֆետ չկարողացանք կառուցել: Դպրոցի տնօրինության որոշմամբ՝ երեխաների սնման համար հետագայում դասարան տրամադրվեց, սակայն դա լուծում չէ: 1600 աշակերտ մեկ դասարանում ինչպե՞ս կարող է տեղավորվել: Բացի այդ՝ հիգիենա չկա»,- դժգոհել է Յալչընը: