«Էդ հայ պատգամավորը». Թուրքիայում հոգաբարձուն անարգել է Փայլանին հայկական գերեզմանոցի պղծման հարցը բարձրացնելու համար

Ներկայիս Թուրքիայի տարածքում գտնվող հայկական Վանի նահանգի Արտամեդի (Էդրեմիթ) քաղաքապետարանը այդպես էլ չի ապամոնտաժում հայկական գերեզմանոցի վրա կառուցված զուգարանները, որոնց ապամոնտաժման մասին հրահանգը տվել էր Թուրքիայի մշակույթի և զբոսաշրջության նախարար Նուման Քուրթուլմուշը:

Ըստ Sputniknews-ի՝ իշխող «Արդարություն և զարգացում» կուսակցության կողմից նշանակված հոգաբարձու Աթըֆ Չիչեքլին հայտարարել է, որ վերոնշյալ շինությունները չեն քանդվելու՝ պնդելով, որ այդ վայրում հայկական գերեզմաններ չկան:

 «Մենք որևէ կառույց չենք տեղադրել և չենք պատրաստվում ապամոնտաժել որևէ կառույց: Չենք ապամոնտաժել և չենք էլ ապամոնտաժելու: Այստեղ հայկական գերեզմանոց չկա: Էդ հայ պատգամավոր Փայլանին և թեմային հետևող բոլոր մարդկանց հայտնում եմ, որ բնության հրաշք հանդիսացող այս վայրը  մենք ավելի կգեղեցկացնենք»,- ասել է Չիչեքլին:

Հիշեցնենք, որ հայկական գերեզմանատունը պղծելու հարցը առաջինը բարձրացրել էր քրդամետ Ժողովուրդների դեմոկրատական կուսակցության հայ պատգամավոր Կարո Փայլանը: