Մայրերի մասնագիտական որակները վերականգնելու մեխանիզմներ ներդնելու ժամանակը չէ՞. Արմենուհի Կյուրեղյան

ԱԺ-ում քննարկվում է կառավարության կողմից ներկայացված «Սոցիալական աջակցության մասին» ՀՀ օրենքում փոփոխություններ և լրացումներ կատարելու մասին և «Պետական նպաստի մասին» ՀՀ օրենքում փոփոխություններ և լրացումներ կատարելու մասին նախագծերի փաթեթն առաջին ընթերցմամբ ընդունելու հարցը:

ԱԺ ՀՅԴ խմբակցության պատգամավոր Արմենուհի Կյուրեղյանը հիմնական զեկուցող` ՀՀ աշխատանքի և սոցիալական հարցերի նախարար Արտեմ Ասատրյանից հետաքրքրվեց նպաստառու մայրերի մասնագիտական որակները վերականգնելու մասին:

«Հայտնի է, որ փոքր երեխաներ ունեցող մայրերը աշխատանքի տեղավորվելու խնդիր ունեն, բայց պակաս կարևոր հարց չէ նաև նրանց մասնագիտական որակների բարելավման խնդիրը»,- նշեց պատգամավորը` ասելով, որ երեխայի` մինչև 2 տարեկան դառնալը շատ մայրեր կորցնում են իրենց մասնագիտական որակները՝ հաշվի առնելով կոնկրետ մասնագիտություններում կատարվող փոփոխությունները: «Արդյո՞ք  «Սոցիալական ապահովության մասին» օրենքում մայրերի մասնագիտական որակների վերականգնման մեխանիզմներ ներդնելու ժամանակը չէ»,- հարցրեց պատգամավորը:

Նախարարը, կարևորելով Կյուրեղյանի բարձրացրած հարցը, նշեց. «Եթե մայրն աշխատաշուկայում այնպիսի տեղ է զբաղեցնում, որը շատ արագ, դինամիկ փոփոխվում է, բնականաբար, մեկ տարի կամ մինչև երեք տարի աշխատաշուկայից դուրս լինելը ենթադրում է մասնագիտական որակների կորուստ և խնդիր ապագա աշխատանքի հետ կապված: Ծրագրով  հնարավորություն կստեղծվի, որ մայրերն ավելի շուտ աշխատանքի վերադառնան»: