Հյուպատոսություններ բացելը թանկ հաճույք է. փոխնախարար

ՀՀԿ խմբակցության պատգամավոր Շիրակ Թորոսյանը 2018թ. բյուջեի քննարկումների ժամանակ ԱԳ փոխնախարար Շավարշ Քոչարյանից հետաքրքրվեց` հաջորդ տարում ԱԳՆ-ն նախատեսո՞ւմ է հիմնել դեսպանատներ ու հյուպատոսություններ: «Մասնավորապես` Ջավախքում հյուպատոսություն հիմնվելո՞ւ  է, թե՞ ոչ»,- հարցրեց նա:

Քոչարյանը պատասխանեց, որ հյուպատոսություններ ու դեսպանություններ հիմնել չեն նախատեսում, որովհետև դա թանկ հաճույք է: «Թիրախային: Գիտեք, որ այս տարի Էրբիլում հյուպատոսություն հիմնեցինք, որովհետև Բաղդադի հետ լավ հարաբերություններ ունենք»,- ասաց նա: 

Ինչ վերաբերում է Ջավախքին, ապա Քոչարյանը չի կարծում, թե դրա կարիքը կա: «Թբիլիսիում ունենք դեսպանատուն, Բաթումում էլ գործում է հյուպատոսություն: Բացի այդ` կա առանց վիզային ռեժիմի անցում»,- ասաց փոխնախարարը: