Դուք երբևէ տեսե՞լ եք «Վաճառվում է մզկիթ» հայտարարություն. Փայլանի ուշագրավ ելույթը՝ խորհրդարանում

Թուրքիայում քրդամետ Ժողովուրդների դեմոկրատական կուսակցության հայ  պատգամավոր Կարո Փայլանը խորհրդարանում հերթական անգամ բարձրացրել է պետության կողմից Ստամբուլի հայկական համայնքից հայկական հիմնադրամների նախագահների ընտրության իրավունքը խլելու հարցը: 

Ըստ «Ակօս»-ի՝ Փայլանը հիշեցրել է Արևմտյան Հայաստանի մոտ 6000  հայկական եկեղեցիների մասին, որոնցից մնացել է ընդամենը 80-90-ը:

«Այդ 6000 եկեղեցիների մեծ մասն այժմ գտնվում է վատ վիճակում, մնացել են դրանց հիմքերը, կամ էլ փլուզման շեմին են: Եկեղեցիներից 4000-ի սեփականությունը պատկանում է անհատների: Պետությունը նրանց ասել է՝ սա ձեզ է պատկանում: Մի ժամանակ հային և հույնին պատկանած եկեղեցիներին դուք տեր չեք կանգնում»,- ասել է պատգամավորը՝ շեշտելով, որ ևս 10 տարի ոչինչ չանելու դեպքում այդ եկեղեցիներից ոչինչ չի մնա:

 Նա անդրադարձել է նաև Ստամբուլում հայերից և հույներից խլված հազարավոր կառույցներին, որոնք նույնպես հավասարեցվում են գետնին: Պատգամավորի խոսքով՝ դա պետության քաղաքականությունն է:

Փայլանն ուշադրության է արժանացրել այն փաստը, որ Թուրքիայում հաճախ վաճառքի են հանվում հայկական պատմական կառույցները: «Տեսեք, «Վաճառվում է եկեղեցի» բովանդակությամբ հայտարարություններ են տեղադրվում համացանցում: Դուք երբևէ տեսե՞լ եք «Վաճառվում է մզկիթ» տիպի հայտարարություն»,- հարցրել է հայ պատգամավորը:

Նա բարձրացրել է նաև պատրիարքական ընտրությունների հարցը: «5 տարի առաջ մեր հիմնադրամներին զրկեցիք անհատական ընտրության հնարավորությունից, 9 տարի էլ պատրիարք չենք կարողանում ընտրել»,- ասել է Փայլանը:

Նրա այս հայտարարությունն իբր հետաքրքրել է ֆինանսների նախարարին: Նա միջամտել է՝ հարցնելով՝  «Ո՞վ թույլ չի տալիս, ո՞ր նախարարությունն է, ինձ ասեք, ես խոսեմ»: