Կենսաթոշակների և նպաստների անկանխիկ վճարման գործընթացում խնդիրներ կան․ վարչապետ

Այսօր կառավարության նիստում վարչապետ Կարեն Կարապետյանը հանձնարարական տվեց առցանց մատուցվող ծառայությունների շրջանակն ընդլայնելու, դրամական վճարները անկանխիկ եղանակով վճարելու ընթացակարգերը պարզեցնելու վերաբերյալ։ 2017թ. սկզբից գործարկվել է երեխայի ծննդյան միանվագ նպաստի առցանց դիմումի հիման վրա համակարգը, որը հնարավորություն է տալիս առաջին և երկրորդ երեխայի ծննդյան դեպքում միանվագ նպաստը ստանալ առցանց եղանակով՝ ներկայացված դիմումի հիման վրա։

«Առցանց եղանակից օգտվել է 15 հազար մարդ։ Իրականացված ուսումնասիրությունների արդյունքում պարզ է դարձել, որ առկա են խնդիրներ կենսաթոշակների և նպաստների անկանխիկ վճարման գործընթացում։ Նշվածը պայմանավորված է բանկերի և համապատասխան պետական մարմինների միջև տեղեկատվության փոխանակության ընթացակարգերի թերություններով և վարչարարության ձևական պահանջներով»,- ասաց վարչապետը:

Հաշվի առնելով վերոնշյալը` նա հանձնարարեց աշխատանքի և սոցիալական հարցերի նախարարին՝ մինչև ս.թ. դեկտեմբերի 30-ը ձեռնարկել միջոցներ ոլորտի անհրաժեշտ տեղեկատվության ստացումն ապահովող ենթահամակարգի մշակման աշխատանքները ավարտելու ուղղությամբ: Ըստ անհրաժեշտության` հարցը քննարկել նաև Կենտրոնական բանկի հետ: Նաև պարզեցնել վարչարարությունը և գործնականում ապահովել կենսաթոշակների, նպաստների, այդ թվում` մինչև 2 տարեկան երեխայի խնամքի նպաստը, 3-րդ և հաջորդ երեխայի ծննդյան դեպքում երեխայի ծննդյան միանվագ նպաստը, ինչպես նաև օրենսդրությամբ սահմանված մյուս դրամական վճարների անկանխիկ եղանակով վճարելու ընթացակարգերի կիրարկումը: