Անարդարություն է. Կիսելյովը՝ Բաքվում Sputnik-ի ներկայացուցիչների հետ տեղի ունեցածի մասին

«Այն, ինչ տեղի է ունենում Բաքվում մեր ներկայացուցչության հետ, մենք ընկալում ենք որպես անարդարություն»,- ասել է «Ռոսիա սեգոդնյա» միջազգային մեդիա խմբի գլխավոր տնօրեն Դմիտրի Կիսելյովը՝ անդրադառնալով Բաքվում Sputnik Ադրբեջանի ղեկավարների ձերբակալությանը:

«Ռոսիա սեգոդնյա» մեդիախմբի գլխավոր տնօրենը նշել է, որ գործակալության լրագրողական աշխատանքի վերաբերյալ ըստ էության բողոքներ չեն եղել և չկան:

Ներկայիս իրավիճակը կարծես միտումնավոր քայլ լինի միջպետական հարաբերությունները վատթարացնելու նպատակով, հավելել է Կիսելյովը։

Ավելի վաղ, հղում անելով ադրբեջանական լրատվամիջոցներին հայտնել էինք՝ Ադրբեջանի անվտանգության մարմինների ներկայացուցիչները ժամանել են ռուսական «Sputnik Ազերբայջան» հրատարակչության Բաքվի գրասենյակ, որտեղ իրականացվել է «հատուկ գործողություն», «ռեյդ»:

Ավելի ուշ պարզ դարձավ, որ Բաքվում ձերբակալված Sputnik Ադրբեջանի ղեկավարներին` տնօրեն Իգոր Կարտավիխին և գլխավոր խմբագիր Եվգենի Բելոուսովին, անհեթեթ մեղադրանք է առաջադրվել, իբր նրանք «ԱԴԾ գործակալներ» են։ Ռուսաստանի դեսպանատան աշխատակիցներին թույլ չեն տվել տեսակցել ձերբակալվածներին։

Նշենք, որ Ադրբեջանի դեսպանը կանչվել է Ռուսաստանի ԱԳՆ Բաքվի ոչ բարեկամական գործողությունների և ռուս լրագրողների անօրինական ձերբակալման առնչությամբ: Այս մասին ՌԻԱ Նովոստիին հայտնել են Ռուսաստանի դիվանագիտական գերատեսչությունից:

Տեսանյութում երևում է, թե ադրբեջանական ոստիկանությունը ինչպես է ձերբակալում Sputnik Ադրբեջան գործակալության տնօրենին և գլխավոր խմբագրին։