էս էլ հո Մալաթիայի շուկան չի. Նիկոլ Փաշինյանը` բացակա պատգամավորների փոխարեն քվեարկողներին

Այսօր ԱԺ-ն միաձայն ընդունեց մի շարք օրենքների նախագծեր, այդ թվում` «Հայաստանի Հանրապետության կառավարության եւ Մոլդովայի Հանրապետության կառավարության միջեւ քաղաքացիների` առանց մուտքի արտոնագրի այցելությունների մասին» համաձայնագիրը վավերացնելու մասին և «Հայաստանի Հանրապետության կառավարության եւ Միգրացիոն քաղաքականության մշակման միջազգային կենտրոնի (ՄՔՄՄԿ) միջեւ Հայաստանի Հանրապետությունում ՄՔՄՄԿ-ի կարգավիճակի մասին» համաձայնագիրը վավերացնելու մասին ՀՀ օրենքների նախագծերը:

Նշենք, որ պարբերաբար քվեարկության հետ կապված խնդիրներ են առաջանում. որոշ պատգամավորներ քվեարկում են իրենց բացակա գործընկերների փոխարեն: Այս կապակցությամբ ԱԺ պատգամավոր Նիկոլ Փաշինյանը հայտարարեց. «Սիստեմատիկ կերպով ՀՀԿ խմբակցության կենտրոնի յարուսի վերջին շարքում 5 հոգով 8 հոգու տեղ են քվեարկում»: Նա հորդորեց պահպանել ԱԺ կանոնակարգը և կոչ արեց ԱԺ նախագահ Արա Բաբլոյանին` չեղյալ հայտարարել բացակա պատգամավորների քվեարկությունը: «էս էլ հո Մալաթիայի շուկան չի»,- նշեց պատգամավորը:

Արա Բաբլոյանը պատասխանեց, որ այսուհետ մշտապես ուշադիր կլինեն: «Շնորհակալ եմ, որ մեզ հնարավորություն տվեցիք, որ այսուհետ ավելի ուշադիր լինենք»,- ասաց նա: