Մենք ենք որոշում՝ ինչին մասնակցել, ինչին` ոչ. Հրանտ Մարգարյան

Այսօր ՀՅԴ-ի կողմից կազմակերպված «Հակառակորդի ռազմաքաղաքական մարտավարությունն ու մեր անելիքները» խորհրդաժողովի ժամանակ ՀՅԴ Բյուրոյի ներկայացուցիչ Հրանտ Մարգարյանը լրագրողների հետ զրույցում անդրադարձավ հարցին, թե ինչո՞ւ ՀՀ-ն վերջին պահին հրաժարվեց մասնակցել Վրաստանում կազմակերպված ՆԱՏՕ-ի զորավարժություններին:

Նա նշեց, որ մենք անկախ երկիր ենք, և մենք ենք որոշում` ինչին մասնակցել, ինչին` ոչ: Մարգարյանը նաև նշեց, թե այն կարծիքին չէ, որ Հայաստանի վարկանիշը դրանից կընկնի: «Ես համոզված եմ, որ Հայաստանը գտնվում է ինչ-որ ռազմաքաղաքական ճամբարի մեջ. յուրաքանչյուր երկիր մտնում է նման ռազմաքաղաքական դաշինքի մեջ»,- ասաց նա:

ՀՅԴ Բյուրոյի ներկայացուցչի խոսքով՝ ճիշտ է, որ մենք չենք փորձում հակադրվել մյուս ճամբարներին, բայց, վերջիվերջո, այդ իրողությունը մեզանից պահանջում է որոշակի կեցվածք:

Հարցին` ի՞նչ է նշանակում վերջին պահին հրաժարվելը, Հրանտ Մարգարյանն արձագանքեց. «Նույնիսկ կարելի է վերջին պահին: Կարելի է նույնիսկ` ամիսներ շարունակ որոշումներ ունենաս, որոնք ինչ-որ տակտիկական նկատառումով վերջին պահին փոխես»։

Նշենք, որ այսօր Վրաստանում մեկնարկած` ՆԱՏՕ-ի «Agile Spirit 2017» զորավարժություններին Հայաստանը չի մասնակցի` վերջին պահին հրաժարվել է մասնակցությունից:

Նշենք նաև, որ Նշենք, որ  պաշտպանության նախարարի տեղակալ Արտակ Զաքարյանը լրագրողների հետ զրույցում հայտարարեց, որ Հայաստանը պաշտոնապես չի հաստատել, որ մասնակցելու է Վրաստանում ՆԱՏՕ-ի զորավարժություններին: