«Արժանապատվությունից ցածր չէ». Զոհրաբյանը կառավարությանը հորդորում է Ծառուկյանի 15 կետերից օգտվել

ԱԺ արտահերթ նիստում ՀՀ 2016 թվականի պետական բյուջեի կատարողականի քննարկման ժամանակ ելույթ ունեցավ «Ծառուկյան» խմբակցության պատգամավոր Նաիրա Զոհրաբյանը: «Վարչապետը նախորդ տարի հայտարարեց՝ տնտեսության վիճակը վատ է, հետո պաուզա վերցրեց և ասաց` այո, շատ վատ է: Իսկ մենք ակնկալում էինք, որ այս ամբիոնից հիմնական զեկուցողը կասեր՝ ինչ կոնկրետ քայլեր ու արդյունքներ կան»,- ասաց նա:

Զոհրաբյանը նշեց, որ ներդրումների մասին հարցերին կառավարության ներկայացուցիչները խուսափում են պատասխանել, որովհետև ասելիք չկա: «Ասում են՝ կներկայացնենք, բայց որևէ փաստ չի ներկայացվում: Փոխարենը լսեցինք արտաքին տնտեսական շոկերի մասին, որ եթե տրանսֆերտները չլինեին, ՌԴ-ի սանկցիաները չլինեին, պղնձի գները չիջեցնեին, Կիկոսի մահի նման մի պատմություն, մեր վիճակը ավելի լավ կլիներ: Իհարկե, արտաքին շոկերը ազդեցություն ունեն, բայց տնտեսությունն ունի իր անվտանգության բարձիկները»,- ասաց նա:

Ապա, դիմելով ֆինանսների նախարարին, պատգամավորն ասաց. «Պարո՛ն Արամյան, եկեք պարզ խոսենք, մենք էլ հասկանում ենք, որ ռիսկային ենք: Մենք չենք չարախնդում նման վիճակի համար: Պետք է բարենպաստ մրցակցային միջավայր ստեղծել ներդրումների համար, որ ներդրողները ՀՀ-ի անունը լսելիս չփախչեն»:

Պատգամավորը հորդորեց Ծառուկյանի առաջադրած 15 քայլերը կյանքի կոչել: «Արժանապատվությունից ցածր չէ, որ օգտվեք այդ առաջարկներից՝ այս վիճակից դուրս գալու համար, ինչ է, թե դուք չեք գրել»,- ասաց Զոհրաբյանը: