Տեսել է` մայրը չկա, մենակ է մանկապարտեզից եկել ու մորը կախված գտել. 30-ամյա կինն ինքնասպան է եղել

Արմավիրի մարզի Նոր Արմավիր գյուղում այսօր 30-ամյա կին է ինքնասպանությւոն գործել` կախվելու միջոցով:

Yerkir.am-ի հետ զրույցում Նոր Արմավիրի գյուղապետ Արթուր Ավետիսյանը նշեց, որ կինը երկու մանկահասակ երեխա ունի: «Կինն իր 5-ամյա տղային առավոտյան տարել է մանկապարտեզ, հետո տուն վերադարձել: Տղան տեսել է, որ մայրը չի գալիս` իրեն տուն տանի, մենակ է մանկապարտեզից տուն եկել ու մորը կախված հայտնաբերել: Հետո վազել է հարևանի տուն ու նրանց օգնության կանչել: Կնոջ կողքին սայլակի մեջ է եղել նրա` 8-9 ամսական աղջիկը»,- ասաց գյուղապետը:

Կնոջ ամուսինը պայմանագրային ծառայող է, այս պահին ծառայությունն իրականացնում է Հուշակերտում: Գյուղապետը նշեց, որ ամուսինն արդեն տեղյակ է դեպքի մասին և գյուղ է շտապում: «Որևէ պատճառ դժվար է նշել` ոչ առողջության հետ կապված խնդիր է ունեցել, ոչ էլ ամուսնու հետ է վատ եղել»,- ասաց նա:

Ըստ գյուղապետի` կնոջ տղայի մոտ են բժիշկները, իսկ դեպքի վայրում աշխատում են իրավապահները` մանրամասները պարզելու համար: